Сўнгги янгиликлар
Янгиликлар
2025-yilning 1-yanvar kuni soat 09:00 holatiga koʻra, Kosonsoy tumanida 6 nafar chaqaloq dunyoga keldi, deya xabar berdi tuman tugʻruq kompleksi maʼmuriyati. Yangi yilning birinchi kuni tugʻilgan chaqaloqlarning 4 nafari oʻgʻil bola, 2 nafari esa qiz bola boʻlib, 2025-yilning birinchi chaqalogʻi soat 02:20da (oʻgʻil bola) tugʻildi. 2025-yilning ilk chaqalogʻini Kosonsoy tumanining “Chust koʻcha” mahallasida yashovchi Manfuratjon Mutalova dunyoga keltirdi.
Kosonsoy tuman hokimligi Axborot xizmati
Har birimizning hayotimizda o‘chmas iz qoldirgan 2024 yil bilan barchamiz xayrlashib, ezgu qadamlar bilan 2025 yilni kutib oldik.
Hurmatli yurtboshimizning bayram tabrigini katta mamnuniyat bilan tinglab, 2025 yil uchun o‘z rejalarimizni ham belgilamoqdamiz.
Fursatdan foydalanib, butun tumanimiz ahlini ushbu qutlug‘ ayyom – kirib kelgan Yangi yil bilan chin qalbimdan samimiy tabriklayman.
Yangi yilda ham ulkan ezgu ishlarni barcha kosonsoyliklar bilan birga davom ettiramiz. Ko‘zda tutilgan rejalarimizning barcha-barchasi, hech shubhasizki, o‘zining mantiqiy yakuniga yetkaziladi va ko‘zlangan maqsadimizga albatta erishamiz degan umiddaman.
Yangi yilda sizlarga mustahkam sog‘lik, oilaviy baxt, Vatanimiz ravnaqi yo‘lidagi mas’uliyatli va sharafli faoliyatingizda esa ulkan muvaffaqiyatlar tilayman.Yangi yilda xonadoningizdan cheksiz quvonch, fayzu baraka, tinchlik-osoyishtalik arimasin!
Buyuk va muqaddas Vatan - jonajon O‘zbekistonimiz osmoni hamisha musaffo bo‘lsin!
📌 Yangi yilingiz muborak bo‘lsin!
Hurmat bilan,Kosonsoy tuman hokimi Dilmurod Qodirov.
Наманган вилояти Ички ишлар бошқармаси томонидан оталиққа олинган Косонсой туманидаги «Нурли маскан» мактаб-интернати болажонлари учун Янги йил байрами ўзгача қувонч билан нишонланди.
Наманган вилояти ИИБ бошлиғи ўринбосарлари ҳамда туман сектор раҳбарлари иштирокида ташкил этилган байрам тадбирида «Нурли маскан» ўқувчилари, тарбиячи-ўқитувчилари ва болажонларнинг ота-оналари иштирок этдилар.
Тадбирда сўз олганлар болажонларни кириб келаётган янги 2025 йил билан самимий қутлашди.
Шундан сўнг, бошқарма бошлиғи ўринбосарлари ҳамда туман сектор раҳбарлари томонидан ҳар бир болажонга байрам совғалари тақдим этилди. Байрамона куй-қўшиқлар, бадиий чиқишлар, жозибали рақслар даврага янада кўтаринкилик бағишлаб, дунёни қалб кўзи билан кўраётган кўплаб болажонларнинг қалбига шодлик улашди. Бундан ташқари эстрадамиз ёрқин юлдузи Нурзида Исаева ҳамда таниқли актёр Дилшодбек Каттабековларнинг ташрифи болажонларга олам-олам қувонч улашди.
Тадбир сўнггида таълим масканида таҳсил олаётган 243 нафар болажонларга Наманган вилояти ички ишлар бошқармаси, Косонсой туман ҳокимлиги ҳамда туман ички ишлар бўлими ҳомийлигида Янги йил байрам совғалари улашилди. Бундан ташқари, Косонсой туманидаги NIS (Namangan International School) жамоаси томонидан ҳам байрам совғалари топширилди.
Косонсой туман ҳокимлиги Ахборот хизмати.
Бугун, Косонсой туман ҳокимлигида Халқ депутатлари туман Кенгашининг учинчи сессияси бўлиб ўтди.
Туман Кенгашининг раиси Дилмурод Қодиров олиб борган сессия ишида туман ва вилоят Кенгашлари депутатлари, сектор раҳбарлари, ҳоким ўринбосарлари, тегишли корхона ва ташкилотлар раҳбарлари ва ОАВ вакиллари иштирок этдилар.
Унда Косонсой туманининг 2025 йилга маҳаллий бюджетини тасдиқлаш, юридик ва жисмоний шахсларининг қишлоқ хўжалигига мўлжалланмаган ерлар учун базавий солиқ ставкаларини белгилаш, Ўзбекистон Республикаси Президентининг Косонсой туман Халқ қабулхонаси мудири Т.Муйдинованинг “Ҳоким ёрдамчилари фаолияти натижадорлигини ўрганиш” ҳамда Халқ қабулхонаси томонидан 2024 йил давомида аҳоли мурожаатлари ва муаммолари билан ишлаш аҳволи юзасидан, “Аёллар дафтари”нинг 5-босқичига киритилган хотин-қизларни рўйхатдан чиқариш тўғрисида, 2024-2025 йилларда “Камбағалликдан фаровонлик сари” дастури доирасида танланган махаллаларда томорқа ерларини суғоришни яхшилаш бўйича дастурни тасдиқлаш тўғрисидаги ва бошқа бир қатор масалалар кўриб чиқилди.
Сессияда кўрилган масалалар бўйича музокаралар олиб борилди ва тегишли қарорлар қабул қилинди.
Сектор раҳбарлари йил давомида ҳар ҳафтада турли ҳудудларда ёшлар билан учрашиб, уларнинг муаммоларини тингладилар ва мурожаатлар қонун доирасида ҳал этилди.
Бугун Косонсой туманидаги “Навбаҳор” маҳалласида “Ёшлар ва бизнесни қўллаб-қувватлаш йили”нинг сўнгги очиқ мулоқоти бўлиб ўтди.
Унда сектор раҳбарлари ишга жойлашиш, узоқ муддатга қўшимча ер олиш, контракт тўлови, болалар нафақаси, тадбиркорлик учун ер, тиббий ёрдам каби масалалардаги мурожаатларни қабул қилдилар ва мурожаатларнинг айримлари шу жойнинг ўзида ҳал этилган бўлса, қолганлари тегишлиги бўйича мутасаддиларга йўналтирилди.
Туман ҳокими ва сектор раҳбарлари барчани кириб келаётган Янги йил билан табриклаб, бу каби юзма-юз учрашувлар изчил давом эттирилишини билдирди.