Бугун Ўзбекистон – Хитой ҳамкорлик муносабатлари кенг кўлам касб этиб, стратегик шериклик алоқалари юксак даражага кўтарилмоқда. Мамлакатларимизнинг миллий манфаатлари, ижтимоий-иқтисодий тараққиёти, жаҳондаги нуфузи юксалишига хизмат қиладиган бу алоқалар ўзаро дўстлик, мустаҳкам ишончга асосланган ҳамкорлик негизида тараққий этмоқда.
Бугун Косонсой туманига "Наманган-Хитой" бизнес форуми доирасида Хитой Халқ Республикаси бир қатор инвесторлари, ишбилармон доира вакиллари бошчилигидаги делегацияси ташриф буюрди.
Меҳмонларни туман ҳокими Дилмурод Қодиров кутиб олиб туманнинг ишлаб чиқариш салоҳияти, инвесторларга яратилган шароит ва қулайликлар ҳақида маълумотлар берди. Дастлабки манзил “Намуна” кичик саноат зонасида жойлашган, лойиҳа қиймати 1 млн. доллар бўлган “Тракх” МЧЖ корхонаси бўлди. Автомобиллар учун эҳтиёт қисмлари ишлаб чиқариш йўлга қўйилган ушбу корхонада ҳозирги кунда 60 нафарга яқин ишсиз аҳоли бандлиги таъминланган.
Корхонанинг 2-босқичини амалга ошириш бўйича ҳамкорликни йўлга қўйиш лойиҳа таклифлари хитойлик ишбилармон доира вакилларига тақдим этилди. Хорижлик ишбилармонларда ушбу корхона катта қизиқиш уйғотди ҳамда келажакда ҳамкорликда ишлаш бўйича келишиб олинди.
Шунингдек, хитойлик инвесторлар «Намуна» кичик саноат зонасидаги «Косонсой томат пастаси» МЧЖ фаолияти билан ҳам яқиндан танишдилар.