ХАЛҚ ДЕПУТАТЛАРИ КОСОНСОЙ ТУМАНИ КЕНГАШИНИНГ 23-СЕССИЯСИ БЎЛИБ ЎТДИ

13.01.2021

Бугун Халқ депутатлари Косонсой туман Кенгашининг йигирма учинчи сессияси бўлиб ўтди. Сессия кун тартибида олтита масала кўриб чиқилди.

Сессия ишида халқ депутатлари туман Кенгаши депутатлари, туман ҳокимининг соҳалар бўйича ўринбосарлари, сектор раҳбарлари, тегишли туман ташкилотлари раҳбарлари, МФЙ раислари ҳамда оммавий ахборот воситалари вакиллари иштирок этдилар.

Дастлаб, Ўзбекистон Республикаси Президенти Шавкат Миромонович Мирзиёевнинг 2020 йил 29 декабрь кунги Олий Мажлисга Мурожаатномасида белгилаб берилган вазифалар ижроси юзасидан туман ҳокими Баҳодир Юсупов ахборот берди.

Масала юзасидан туман Кенгаши депутатлари В.Тожибоева, И.Жўраевлар музокара сўзга чиқиб, фикрларини билдирдилар.

Шундан сўнг, халқ депутатлари Косонсой туман Кенгаши котибиятини ташкил этиш, котибият мудирини тайинлаш, Кенгаш котибияти бош мутахассисларини тайинлаш тўғрисидаги масалалар депутатлар томонидан кўриб чиқилди.

Унга кўра, Халқ депутатлари Косонсой туман Кенгаши котибияти ташкил этилиб, котибият мудири сифатида 18-Гурмирон округидан сайланган депутат Дилфуза Валиева номзоди маъқулланди. Котибиятнинг бош мутахассислари сифатида Дилшод Темиров, Жаҳонгир Хўжамовлар тасдиқланди.

Сессия давомида Косонсой туманида 2021 йил учун юридик ва жисмоний шахсларнинг қишлоқ хўжалигига мўлжалланмаган ерлар учун базавий солиқ ставкаларини белгилаш тўғрисида Косонсой туман Давлат солиқ инспекцияси бошлиғи ўринбосари Фарҳод Валиевнинг ахбороти тингланди. 

Шу билан халқ депутатлари Косонсой туман Кенгашининг йигирма учинчи сессияси ўз ишини якунлади. Сессия якунида туман Кенгашининг тегишли қарорлари қабул қилинди

 

Косонсой туман ҳокимлиги ахборот хизмати

КОСОНСОЙ ТУМАНИДА СУВ ТЕЖОВЧИ ТЕХНОЛОГИЯЛАРНИ ЖОРИЙ ЭТИШ БЎЙИЧА АМАЛИЙ СЕМИНАР ЎТКАЗИЛДИ

13.01.2021

Президентнинг 2020 йил 11 декабрда қабул қилинган “Қишлоқ хўжалигида сувни тежайдиган технологияларни жорий этиш чора-тадбирлари тўғрисида”ги қарорининг вилоятда ижросини таъминлаш мақсадида Косонсой туманидаги “Жамолиддин Абдувоҳид боғлари” фермер хўжалигида сув тежовчи технологияларни жорий этиш бўйича вилоят амалий семинари ташкил этилди.

 

Унда вилоят ҳокими Шавкатжон Абдураззақов, вилоят ва туман сектор раҳбарлари, кластер ҳамда қишлоқ хўжалигига дахлдор мутасаддилар қатнашди.

 

Косонсой туманининг мураккаб сув таъминоти тизимида сув тежовчи технологияларни жорий этиш, сувдан самарали фойдаланиш ва унинг беҳуда сарфини олдини олиш муҳим аҳамият касб этади. Бу борада қабул қилинган кўплаб қарор ва фармонлар билан яратилган имконият ва қулайликлар, берилаётган имтиёзлар фермер хўжаликлар учун айни муддао бўлиб, экин ерлари, боғ ва токзорларнинг 55-60 фоизигача бўлган қисмини замонавий суғориш технологиялари асосида суғориш тизимига ўтказиш чоралари кўрилмоқда.

 

“Жамолиддин Абдувоҳид боғлари” фермер хўжалиги томонидан ўтган  йили 252 гектар пахта ва 57 гектар боғ майдонида томчилатиб суғориш технологиялари жорий этилиб, ушбу фермер хўжалигига қарор асосида 8 миллион сўмдан субсидия ажратилди ва кредит маблағларининг бир қисми қоплаб берилди.

 

2021 йил учун тасдиқланган режага асосан туманда 1260 гектар пахта майдонида томчилатиб суғориш, 160 гектар майдонда эгилувчан қувурлар билан, 100 гектар майдонда плёнка тўшаб суғориш технологияларини татбиқ этиш кўзда тутилган.

 

Туманда сув тежовчи технологияларни жорий этиш ҳисобига 44 млн куб метр сувни иқтисод қилиш имконияти яратилади.

 

Йиғилишда асосий масала томчилаб суғориш технологиясини кенг жорий этиш, сувдан унумли фойдаланиш ва қандай тартибда шартнома қилиш, янги технологияларни ўрнатиш борасида йиғилганларга соҳа мутахассислари томонидан тушунтиришлар берилди.

 

Вилоят семинари якунида қишлоқ хўжалигида амалга ошириладиган агротехник тадбирлар, суғориш ва ўғитлаш масалалари ҳам муҳокама этилди.

КОСОНСОЙ, ЧОРТОҚ ВА ЯНГИҚЎРҒОНДА МЕВА-САБЗАВОТЧИЛИК, УЗУМЧИЛИК РИВОЖЛАНТИРИЛАДИ

13.01.2021

“Наманган вилоятининг Косонсой, Чортоқ ва Янгиқўрғон туманларида мева-сабзавотчилик ва узумчиликни ривожлантириш чора-тадбирлари тўғрисида”ги Президент қарори (ПҚ–4941-сон, 11.01.2021 й.) қабул қилинди.

 

Қарорга кўра, Наманган вилояти Косонсой, Чортоқ ва Янгиқўрғон туманларида 2021–2022 йиллар ҳосилидан қисқартириладиган ғалла майдонларига қишлоқ хўжалиги экинларини жойлаштиришнинг прогноз кўрсаткичлари тасдиқланди.

 

✅ Шунга кўра, вилоят бўйича 8 220 гектар (шу жумладан Косонсой туманидан 3 000 гектар, Чортоқ туманидан 2 100 гектар, Янгиқўрғон туманидан 3 120 гектар) ғалла майдонлари қисқартирилиб, мазкур туманларда қуйидагилар ташкил этилади:

 

1 850 гектар замонавий интенцив боғ;

1 300 гектар токзор;

1 440 гектар сабзавот;

960 гектар картошка;

1 510 гектар дуккакли ва 1 160 гектар мойли экинлар.

 

✅ Ҳар бир туманда уруғлик ва кўчатлар билан таъминлаш имкониятидан келиб чиқиб, сабзавот экинлари ва картошка уруғчилигига ҳамда мевали дарахт ва ток кўчатлари етиштиришга ихтисослашган фермер хўжаликлари ташкил этилади.

 

➡️ Шунингдек, белгиланган туманларда сертификатланган сабзавот, дуккакли ва мойли экинлар уруғларини ҳамда мевали дарахт ва ток кўчатларини етиштирувчилар томонидан тўланадиган ер солиғи 3 йил муддатга 50 фоизга камайтирилади.

 

Аҳоли ишсизлигини камайтириш учун туман ҳокимликлари захирасидаги яхлит 300-500 гектар майдонларда плантация усулида интенсив боғ ва токзорлар барпо этилиб, лизинг асосида 7 йил муддатга аҳолига бериш чоралари кўрилади.

КОСОНСОЙ ТУМАНИДА ТАЪЛИМ ТИЗИМИГА ОИД ТАНҚИДИЙ - ТАҲЛИЛИЙ ЙИҒИЛИШ БЎЛИБ ЎТДИ

11.01.2021

Мамлакатимизда эртанги кунимиз ишончи ва суянчи бўлган келажагимиз эгаларига ҳар жиҳатдан юксак эътибор қаратилиб, уларнинг илм-фан, спорт ва санъат, маънавият, умуман, барча соҳаларда юксак марраларга интилиб, муносиб камол топишлари учун барча имкониятлар яратиб берилмоқда.

Бугунги янгиланишлар жараёни, тараққиёт асри талаблари ёш авлодни эртанги кун сари шаҳдам етаклашда устоз-мураббийлардан фаоллик, фидойилик, ўзига хос ташаббуслар кўрсатишни тақозо этади.Косонсой тумани ҳокимлигида туман халқ таълими бўлими тасарруфидаги умумий ўрта таълим мактаблари фаолиятида сифат ва самарадорликка эришиш, битирувчиларни олий таълимга қамрови, ёшлар ўртасида ҳуқуқбузарлик ва жиноятчиликни олдини олиш, тизимда йўл қўйилган камчиликлар таҳлили, амалга оширилиши лозим бўлган устувор вазифаларга бағишланган танқидий-таҳлилий йиғилиш бўлиб ўтди. Унда туман ҳокими Баҳодир Юсупов, вилоят халқ таълими бошқармаси бошлиғи Рустамжон Исраилов, туман прокурори, Халқ таълими вазирининг ҳуқуқий назорат инспекцияси, Вазирлар Маҳкамаси ҳузуридаги Таълим сифатини назорат қилиш инспекцияси ҳудудий бўлими мутасаддилари, вилоят халқ таълими бошқармаси бўлим бошлиқлари ҳамда тумандаги 58 та таълим муассасаларининг директорлари, ўқув ва маънавий ишлар  бўйича директор ўринбосарлари қатнашдилар. Йиғилишда ёшлар истиқболи ва таълим жараёнларида эришилаётган ютуқ ва муваффақиятлар, ижобий натижаларга алоҳида тўхталинди.

Шу билан бирга фаолиятда учраётган камчилик ва нуқсонлар, йўл қўйилаётган камчиликларга танқидий тарзда ёндашилди. Косонсой туманидаги таълим соҳасида ҳамон тизимли муаммолар борлиги, мактабларнинг моддий-техник базаси, айрим педагог ходимларнинг билим ва малакаси бугунги замон талабларига жавоб бермаслиги танқид қилинди. 2019/2020 ўқув йили якуни бўйича Республика таълим инспекцияси томонидан ўтказилган “Миллий рейтинг”да Наманган вилоятида 68 та мактаб иштирок этган эди. Рейтингнинг 100 баллик баҳолаш мезонига кўра, Косонсой туманидаги 1-умумий ўрта таълим мактаби 27 балл билан республикада 621-, 2-мактаб 26 балл билан 660- ўринни, 3-мактаб  эса 23 балл билан 772-ўринни банд этган. Бу эса ушбу мактабларда ўқувчиларга билим бериш қониқарсиз аҳволдалиги, ўқитувчиларнинг малака ва маҳорат борасида ўз устида ишламаётгани, салоҳияти етарли даражада эмаслиги ҳамда мактаб раҳбарлари томонидан сифат ва самарадорликка эътиборсиз ёндашилганини кўрсатади. 3-умумий ўрта таълим мактабининг 63 нафар битирувчисидан 1,  9- мактабнинг 78 битирувчисидан бор йўғи 2 нафари олий ўқув юртига кирган холос. 40 -, 12- мактабларнинг эса бирорта ҳам битирувчиси ОТМларга кира олмаган. Фаолиятда йўл қўйилган камчиликлар ва лавозим мажбуриятларини бажармаганликлари учун тумандаги 2-, 9-, 14-, 20-, 40-, 45-, 46-сонли мактаб директорлари лавозимидан озод этилиб,  маънавий-маърифий ишлар бўйича ўринбосарларининг келгусидаги фаолияти кўриб чиқилиши белгиланди.  Шунингдек, мактаблар фаолиятини етарли назорат қилмаганлиги, ўз вазифасига совуққонлик билан қараганлиги, ташаббускорлик етишмаслиги учун Косонсой туман халқ таълими бўлими мудирига ойлик иш ҳақининг 30 фоизи миқдорида интизомий жазо чораси қўлланилди. Йиғилишда туманда халқ таълими тизимини тубдан такомиллаштириш, муаммоларни комплекс ҳал этиш масалалари чуқур таҳлил қилиниб, келгусидаги вазифалар муҳокама этилди. Иштирок этган раҳбар ва мутасаддилар, таълим соҳасида фаолият юритаётган тажрибали ва фидойи муаллимлар, зиёлилар, муҳокама қилинган масалалар юзасидан ўз фикр-таклифларини билдирдилар. Туман халқ таълими бўлимига йиғилишда кўрилган масалалар юзасидан ишларни кучайтириши ва мунтазам назорат ўрнатиш  ҳамда амалга оширилаётган ислоҳотлар юзасидан раҳбарларнинг шахсий масъулиятини ошириши лозимлиги таъкидланди. Вилоят халқ таълими бошқармаси томонидан бу каби танқидий-таҳлилий  йиғилишлар келгусида барча туманларда ўтказилиши режалаштирилган.

 

Наманган вилоят халқ таълими бошқармаси Ахборот хизмати

КОСОНСОЙ ТУМАНИДА 2021 ЙИЛДА 4 ТА МАҲАЛЛАДА АҲОЛИ МУАММОЛАРИ ҲАЛ ЭТИЛАДИ

11.01.2021

Президентимиз Шавкат Мирзиёев Олий Мажлисга йўллаган Мурожаатномаларида 2021 йилда мамлакатимизда “Обод қишлоқ” ва “Обод маҳалла” Давлат дастурлари бўйича ишлар давом эттирилиб, энг чекка ҳудудлардаги аҳолини қийнаб келаётган муаммолар ҳал этилишини таъкидлаб ўтган эдилар.

 

Янги йил бошиданоқ ана шу мақсад учун туман ҳокимлиги ва секторлар томонидан режалар тузиб олинди.

 

Вилоят ҳокимлигида бўлиб ўтган аҳоли турмуш даражасини яхшилаш бўйича амалга ошириладиган ишлар тақдимотида вилоят  ҳокими Шавкатжон Абдураззақов энг аввало, аҳоли учун энг зарур бўлган масалалар ечимига эътибор қаратиш зарурлигини таъкидлади. Ҳар бир туманнинг 4 та секторидан 4 та энг оғир маҳалла фуқаролар йиғини ҳудудини намунали ҳолатга келтириш масаласида туман ва шаҳар ҳокимларига, шунингдек, тегишли ташкилот ҳамда корхона раҳбарларига топшириқ ва кўрсатмалар берилди.

 

Жумладан Косонсой туманининг сектор раҳбарлари томонидан 1-сектор ҳудудидаги Чорбоғ МФЙ, 2-сектор ҳудудидаги Булоқбоши МФЙ, 3-сектор ҳудудидаги Навбаҳор 2 МФЙ, 4-сектор ҳудудидаги Учқўрғон МФЙ ҳудудларини намунали ҳолатга келтириш масаласида амалга оширилиши режалаштирилган презентация кўринишадиги чора-тадбирлар режаси вилоят ҳокимига тақдим этилди.

 

Унга асосан, қуйидагилар амалга оширилади:

 

Туман ҳокими Б.Юсупов раҳбарлик қилаётган 1-сектордаги Чорбоғ маҳалласида 511 та хонадон, 712 оилада 3016 нафар аҳоли яшайди.

 

Дастурга кўра, электр энергияси таъминотини яхшилаш учун 1 дона трансформатор ўрнатиш, 1,2 км тармоқни янгилаш, 137та хонадонларни тоза ичимлик суви билан таъминлаш ёки яхшилаш мақсадида 1,85 км ичимлик сув тармоғини тортиш, аҳоли хонадонларини маиший газ баллонларига бўлган талабини қондириш мақсадида 100дона суюлтирилган газ балонларини етказиш бериш, 1,3 км узунликдаги ички йўлларни асфальтлаш, 1,8 км узунликдаги ички кўчаларни шағаллаш, 60та тунги ёритиш чироқлари ўрнатиш учун 54,3 млн сўм ажратилади.

 

Тумандаги 1-, 2-, 3-, 4-секторлар ҳудудларидаги Чорбоғ, Булоқбоши, Навбаҳор 2, Учқўрғон МФЙ лардаги ижтимоий-иқтисодий ҳамда инфратузилма объектларини ҳолатини яхшилаш бўйича амалга оширилаётган ободонлаштириш ишлари  мамлакатимизда инсон манфаати, унинг фаровон ҳаёти учун қаратилаётган эътибор намунасидир.

ВИЛОЯТ ҲОКИМИ КОСОНСОЙ ТУМАНИДА ҚИШЛОҚ ХЎЖАЛИГИДА ОЛИБ БОРИЛАЁТГАН ИШЛАР БИЛАН ТАНИШДИ

08.01.2021

Жорий йилда Косонсой туманида қишлоқ хўжалиги соҳасида юксак марралар кўзланган. Хусусан, 6170 майдонда ғалла, 3955 гектар майдонда пахта етиштирилмоқда.

Вилоят ҳокими ва соҳага дахлдор мутасадди ташкилотлар раҳбарлари махсус автобусда тумандаги бир қатор фермер хўжаликларида бўлиб, ғалла парвариши ва олиб борилаётган ишлар билан танишишди.

Дастлаб вилоят раҳбари Наимхон Ашрапов раҳбарлигидаги “Пахтакор саховати” фермер хўжалиги даласида бўлиб, ғалла майдонини кўздан кечирди.

Фермер хўжалигида томчилаб суғориш усулидан кенг фойдаланилиб, яхши натижага эришилмоқда. Ўтган йили 32 гектар майдонда бу усул қўлланилиб, пахтадан 37 центнердан ҳосил олинди. 2021 йилда қўшимча 20 гектар майдонда ушбу усул қўлланиладиган бўлди.

Шундан сўнг Шавкатжон Абдуразоқов “Тошлоқсой олтин толаси” фермер хўжалигида бўлиб, иш фаолияти билан танишди.

Бу ерда жонлиқ сўйилиб, қишлоқ хўжалиги фахрийлари жорий йил ҳам баракали келишини тилаб, дуо қилди.

Вилоят раҳбари Туятойди массивидаги кичик саноат зонасида олиб борилаётган ишларни кўздан кечирди.

Гўрмирон ҳудудида жойлашган 26 гектарлик «Намуна» кичик саноат зонасида 210 миллиард сўмлик 27 та лойиҳа амалга оширилмоқда. Бунинг натижасида 1700 тага яқин янги иш ўрни яратилади.

Шавкатжон Абдураззақов Намуна массивида 10 миллиард сўм миқдоридаги “Modern gold rabbits” лойиҳаси билан ҳам танишди. Қуёнчилик кластери билан шуғулланиши назарда тутилган ушбу лойиҳа хусусида афғонистонлик инвестор Ҳамраҳ Элҳамуддин билан мулоқот қилди.

Шундан сўнг вилоят раҳбaри “Агрокимёҳимоя” ҳудудий акционерлик жамиятининг Косонсой туман филиалида бўлиб, олтинкўз, трихограмма, мумкуя қурти сингари фойдали ҳашоратлар кўпайтирилаётганлигини кўздан кечирди.

Вилоят ҳокими Тергачи ММТП ҳудудидаги “Ертикан олтин дони” фермер хўжалиги дала шийпони бўлди. У ерда пиллачилар билан учрашиб, заҳматкаш аёллар билан суҳбатда бўлди, уларга бу йил меҳнатлари янада кўпроқ қадрланишини билдирди.

СПОРТНИНГ ВОЛЕЙБОЛ ТУРИ БЎЙИЧА ХОТИРА МУСОБАҚАСИ БОШЛАНДИ

07.01.2021

Президентимизнинг “Соғлом турмуш тарзини кенг татбиқ этиш ва оммавий спортни янада ривожлантириш тўғрисида”ги ПФ-6099-сонли фармони ижросини таъминлаш ҳамда 14 -январь - “Ватан ҳимоячилари куни” ҳамда марҳум спорт фидойиси Абдураҳимхон Абдураҳмонов хотирасининг 30 йиллиги муносабати билан уюшмаган ёшлар ўртасида волейбол спорт тури бўйича анъанавий вилоят очиқ биринчилиги мусобақаси бошланди.

Ушбу тадбирларни ташкил этишдан мақсад, ёшларни жисмонан чиниқтириш, бўш вақтларини мазмунли ўтказиш, спортга бўлган қизиқишларини янада ошириш, соғлом турмуш тарзини шакллантириш каби йўналишлардан иборатдир.

ХАЛҚ ДЕПУТАТЛАРИ КОСОНСОЙ ТУМАН КЕНГАШИНИНГ ЙИГИРМА ИККИНЧИ СЕССИЯСИ БЎЛИБ ЎТДИ

30.12.2020

Сессияда  Халқ депутатлари туман Кенгаши депутатлари, сектор раҳбарлари, туман ҳокимлигининг гуруҳ ва бўлим раҳбарлари, тумандаги ташкилот ва корхоналар рахбарлари, туман судлари раислари, Халқ қабулхонаси мудири, фермер хўжаликлари рахбарлари, маҳалла фуқаролар йиғинлари раислари ҳамда оммавий ахборот воситалари вакиллари иштирок этдилар.

Дастлаб, “Туманда 2020 йил ҳосили учун қишлоқ хўжалиги соҳасида, ҳусусан пахта ва ғаллачилик йўналишларида жиддий камчиликларга йўл қўйган бир қатор фермер хўжаликлари ер майдонларини туман ҳокимлиги заҳирасига қайтариб олиш тўғрисида”ги масала юзасидан пахта ва ғаллачилик йўналишларида жиддий камчиликларга йўл қўйган бир қатор фермер хўжаликлари ер майдонларини туман ҳокимлиги заҳирасига қайтариб олиш чоралари кўриб чиқилди.

Навбатда, “2021 йил учун Косонсой туманининг маҳаллий бюджети тўғрисида”ги иккинчи масала бўйича туман молия бўлими бошлиғи Э.Тошпўлатовнинг ҳисоботи тингланди. 2021 йилда туман бюджет параметрлари тасдиқланди.

Сессия давомида  Ўзбекистон Республикаси Президентининг Косонсой туманидаги Халқ қабулхонаси мудири Т.Муйдинованинг секторлар ҳамда ҳудуддаги ташкилотлар раҳбарлари томонидан йил давомида мурожаатлар  билан  ишлашнинг  ҳолати тўғрисида  ахбороти бўйича аҳоли мурожаатлари билан ишлашда камчиликларга йўл қўйган бир қатор ташкилот раҳбарларининг фаолияти муҳокама этилди.

Шунингдек, сессия кун тартибида туман секторлар раҳбарлари, Жиноят ва Маъмурий ишлар бўйича Косонсой туман судлари раислари, туман ҳокимининг соҳалар бўйича ўринбосарлари,  томонидан 2020 йилда амалага оширилган ишлар ва 2021 йилда амалга оширилиши лозим бўлган вазифалар тўғрисида ҳисоботлар тингланди.

Шу билан бирга, экология ва атроф мухитни мухофаза қилиш соҳасида назорат бўйича Косонсой туман инспекцияси бошлиғи М.Турсуновнинг атроф мухитни мухофаза қилиш сохасида амалга оширилган ишлари, “Саховат ва кўмак” жамғармасига тушган маблағларини сарфлаш, “Ўзбекистон Республикаси Президентининг 2019 йил 8 ноябрдаги “Репродуктив ёшдаги аёллар, ҳомиладорлар ва болаларга кўрсатиладиган тиббий ёрдам сифатини ошириш ва кўламини янада кенгайтириш тўғрисида”ги ПҚ-4513 сонли қарори тўғрисидаги масалалар депутатлар томонидан муҳокама этилди.

 

Сессия якунида кўрилган масалалар юзасидан туман Кенгашининг тегишли қарорлари қабул қилинди.

 

Косонсой туман ҳокимлиги ахборот хизмати

БАЙРАМ АРАФАСИДА БОЛАЖОНЛАРГА МЕҲР УЛАШИЛДИ

30.12.2020

Меҳр-мурувват, саховат халқимизга хос азалий қадриятлардан ҳисобланади. Юртимизда ўсиб келаётган ёш авлодга алоҳида эътибор қаратилаётган бугунги кунда бу қадриятнинг аҳамияти янада ортиб бормоқда. Янги йил арафасида жойларда  байрамлар, турли  хайрия тадбирлари ўтказиш кенг қулоч ёймоқда.

 

Шундай тадбирлар Косонсой туманида ҳам бўлиб ўтмоқда. Туман ҳокими Б.Юсупов ҳамда Олий Мажлис Қонунчилик палатаси депутати А.Темиров ташаббуси билан тумандаги 11, 33 – сонли мактабгача таълим ташкилотларида тарбияланаётган, кам таъминланган, “Темир дафтар”ларга киритилган  оилалар фарзандларига янги йил совғалари улашилди.

 

-  Болалар ёниб турган, қувончга тўла кўзлари билан бошқаларни ҳам қувонтирадилар – дейди туман  мактабгача таълим бўлими мудири Р.Каримова

 

Тадбир давомида болажонлар ватан, она, янги йилни мадҳ этувчи шеърлари билан йиғилганларни шод этишди. Ташаббускорлар томонидан улашилган совғалар болажонларнинг қувончига қувонч қўшди.

 
© 2014-2021, Namangan viloyat Kosonsoy tuman hokimligining rasmiy axborot portali. Sayt materiallaridan foydalanilganda www.kosonsoy.uz manbasi ko'rsatilishi shart.
Sayt Namangan viloyati hokimligining Kompyuterlashtirish markazi tomonidan ishlab chiqilgan.