КОСОНСОЙДА ИШСИЗ ЁШЛАРГА 20 СОТИХДАН ЕР АЖРАТИБ БЕРИЛДИ

09.02.2021

Ёшлар мамлакат келажагининг пойдевори. Бу борада кенг кўламли ислоҳотлар амалда тадбиқ этилиб, қатор имкониятлар яратилмоқда. Энг асосийси, бугун жойларда уларга эътибор қаратилиб, ғоя ва ташаббуслари ҳар томонлама қўллаб-қувватланмоқда.

 

Косонсой туманидаги  212 мингдан зиёд аҳолининг 39548 нафарини ёшлар ташкил этади. Ўтказилган хатловда улардан 4517 нафари “Ёшлар дафтари”га киритилиб, бандлигини таъминлаш, касб-ҳунарга ўқитиш орқали ижтимоий шароитларини яхшилаш бўйича бир қатор ишлар амалга оширилмоқда.

 

Қишлоқ хўжалигида ёшлар бандлигини таъминлаш, уларни молиявий қўллаб-қувватлаш, қишлоқ жойларда янги иш ўринларини яратиш мақсадида жорий йилда туманда 1203 нафар ишсиз йигит-қизнинг бандлиги таъминланади.

Бугун 1-сектор ҳудудидаги “Худойбердиев” ММТП ҳудудида жойлашган “Хурмазор меваси” фермер хўжалигидаги 17 гектар ер майдонидан Қозоғовул, Янгийўл, Янгишаҳар МФЙларида истиқомат қилувчи 85 нафар ишсиз ёшга энг серунум майдонлардан йигирма сотихдан ер ажратиб берилди ва бу ҳақдаги махсус сертификат топширилди. Улар полиз ва сабзавот экинлари экиб, оилалари даромадига ўз ҳиссаларини қўшадилар. Туман қишлоқ хўжалиги бўлимидан тайинланган мутахассис ёш деҳқонлар ишини кузатиб, амалий ёрдам ва маслаҳат бериб боради.

Тадбирда туман ҳокими Баҳодир Юсупов сўзга чиқиб, берилаётган бу имкониятлардан оқилона фойдаланиб, йилига икки мартадан ортиқ ҳосил олишга ҳаракат қилиш ва даромадни кўпайтириш зарурлигини, бунинг учун ҳамма шароитлар яратиб берилишини таъкидладилар. Шунингдек, туман ҳокимининг таклифи билан ёшлар иштирокида “Ёш деҳқонлар кенгаши” ташкил этилди.

Шу куннинг ўзида ажратилган ерлар ўз эгаларига бириктирилди ҳамда зарур агротехник тадбирлар бошланди. Ҳадемай, заминга уруғ қадалади, илк ҳосил бўй кўрсатади. Муҳими, косонсойлик ёшларнинг қўлида бугун муайян ишлари бор. Улар энди мустақил равишда фаолият бошлаб, даромадга эга бўлишади.

ШАҲАРСОЗЛИК НОРМАЛАРИ ВА ҚОИДАЛАРИ АМАЛДАМИ?

09.02.2021

Туманимизда Ўзбекистон Республикаси Вазирлар Маҳкамасининг 2009 йил 12 февралдаги “Аҳоли пунктларини комплекс қуришда шаҳарсозлик нормалари ва қоидалари қатъий бажарилишини назорат қилишни кучайтиришга доир қўшимча чора-тадбирлар тўғрисида”ги 41-сонли қарорининг бажарилишини таъминлаш мақсадида туман ҳокимлиги ҳузуридаги аҳоли пунктлари комплекс қурилишини назорат қилиш ҳудудий комиссияси жойларда тушунтириш ишларини олиб бормоқда.

Жумладан, бугун Навбахор-2, Баҳористон МФЙларда 1 тадан, Учқўрғон МФЙларда 8та ноқонуний қурилиш ҳамда умум фойдаланишда бўлган кўчани эгаллаб олинганлиги аниқланди.

Туман ишчи гуруҳи билан биргаликда барча ноқонуний қурилиш ишларини амалга оширган фуқаролар мазкур қурилиш ва кўчма қурилмаларни 7 (уч) иш куни мобайнида бартараф этишлари тўғрисида расман огоҳлантирилдилар.

Ушбу аниқланган ноқонуний қурилмаларни бузиш ишлари амалга оширилмоқда.

 

Косонсой туман  ҳокимлиги ахборот хизмати

ЎЗБЕКИСТОНДА САЙЛОВЛАР ОКТЯБРЬ ОЙИДА ЎТКАЗИЛАДИ

09.02.2021

“Сайлов қонунчилиги такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Қонун (ЎРҚ-670, 08.02.2021 й.) қабул қилинди.

 

Ўзгартиришга кўра, Президентликка сайлов, Олий Мажлиснинг Қонунчилик палатасига,  Қорақалпоғистон Республикаси Жўқорғи Кенгесига, вилоятлар, туманлар, шаҳарлар давлат ҳокимияти вакиллик органларига сайлов тегишинча уларнинг конституциявий ваколат муддати тугайдиган йилда – октябрь ойи учинчи ўн кунлигининг биринчи якшанбасида ўтказилиши белгиланди (илгари декабрь ойида  эди).

 

Шунингдек, сайловларни ўтказиш бўйича сайлов участкалари туманлар ва шаҳарлар ҳокимликларининг тақдимномасига биноан округ сайлов комиссиялари томонидан, туман, шаҳар Кенгашлари депутатлари сайловини ўтказиш бўйича сайлов участкалари эса туман, шаҳар сайлов комиссиялари томонидан тузилади (илгари сайлов участкалари туман ва шаҳарлар ҳокимликлари тақдимномасига биноан округ сайлов комиссиялари томонидан тузилган).

 

Эндиликда Халқ депутатлари туман, шаҳар (бундан халқ депутатлари Тошкент шаҳар Кенгаши мустасно) Кенгашига сайлов ўтказиш бўйича округ сайлов комиссиялари тузилмайди.

 

 Қонун расмий эълон қилинган кундан эътиборан кучга киради.

АЛИШЕР НАВОИЙ ТАВАЛЛУДИНИНГ 580 ЙИЛЛИГИ КЕНГ НИШОНЛАНАДИ

08.02.2021

 

Аждодларимизнинг маънавий меросига ҳурмат билан қараш, уларни асраб-авайлаш ҳар биримизнинг муқаддас бурчимиздир. Зеро, маънавияти юксак миллатнинг келажаги буюк ва мустаҳкам бўлади.

Ушбу фикрнинг исботи мисолида юртимиз бўйлаб улуғ мутафаккир бобомиз Алишер Навоий таваллудининг 580 йиллиги кенг нишонланаётганини кўрамиз. Бугун Косонсой туманидаги Маданият марказида ҳам доно маслакдош, чинакам давлат арбоби, ўз асарлари билан халқ қалбидан жой олган ғазал мулкининг султони Навоий бобомиз хотирасига бағишлаб  маънавий-маърифий тадбир кўтаринки руҳда ўтказилди.

Анжуманда 8-сонли мактаб ўқувчилари томонидан Навоий бобомиз асарлари ҳақида атрофлича маълумот берилди. Туман маданият бўлими хушовоз хонандалари шоир ғазалларини куйга солиб йиғилганларни хушнуд этдилар. Ўқувчиларининг тайёрлаган саҳна кўринишлари барчага кўтаринкилик бағишлаб, тадбирга файз киритди.

ҚУРИЛИШ СОҲАСИДА ДАВЛАТ ХАРИДЛАРИНИ ЎТКАЗИШНИНГ ЯНГИ ТИЗИМИ ЖОРИЙ ЭТИЛАДИ

08.02.2021

“Қурилиш соҳасида электрон давлат харидларини ташкил этиш ва ўтказиш тартибини такомиллаштириш чора-тадбирлари тўғрисида”ги Ҳукумат қарори (55-сон, 05.02.2021 й.) қабул қилинди.

 

Қарорга кўра, қурилиш соҳасида давлат харидларини ташкил этиш ва ўтказишнинг янги тизими жорий этилади.

 

Унга кўра:

 

қурилиш соҳасида давлат харидларини ўтказишда танлов ҳужжатларининг умумий ва техник қисмларини тақдим этиш талаб этилмайди;

 

электрон танлов (тендер) савдоларини амалга ошириш учун танлов ҳужжатлари ва техник вазифалар фақат товарлар (ишлар, хизматлар) ҳажмларини ва уларнинг нарх параметрларини баҳолаш қисми бўйича комплекс экспертизадан ўтказилади;

 

танлов савдоларида жорий йил учун молиявий мажбуриятлари ҳажми қурилиш-пудрат ташкилотларининг сўнгги уч йиллик ҳисобот даврининг бир йилида бажарилган энг йирик ишлар ҳажмининг 1,5 бараваридан ошган оферентлар иштирок этмайди;

 

танлов натижалари бўйича шартномада белгиланган нархга нисбатан сифати ва ҳажмига таъсир қилмаган ҳолда тежалган маблағлар пудрат ташкилоти тасарруфида қолдирилади.

 

Қарорга кўра, “Шаффоф қурилиш” миллий ахборот тизими ҳамда танловларни ўтказиш бўйича махсус ахборот портали операторлари ўртасида электрон ахборот алмашинуви йўлга қўйилади.

 

Қарор билан қурилиш соҳасида электрон давлат харидларини ташкил этиш ва ўтказиш тартиби тўғрисидаги вақтинчалик низом тасдиқланди.

ТУМАН ЁШЛАРИ БИЛАН НАВБАТДАГИ ОЧИҚ МУЛОҚОТ ЎТКАЗИЛДИ

05.02.2021

Косонсой туманида ёшлар билан ишлашнинг янгича тизими доирасида очиқ мулоқот ташкил этилди. Учрашувда туман ҳокими Б.Юсупов, Олий Мажлис Қонунчилик палатаси депутати Ш.Раҳимов, Давлат хизматини ривожлантириш агентлиги бош инспектори А.Раҳманов, Бандлик ва меҳнат муносабатлари вазирлиги масъул ходими О.Зуннунов ҳамда туман давлат идора ва муассасалари раҳбарлари ҳамда ишсиз, уюшмаган ёшлар иштирок этишди.

Дастлаб, туман ҳокими Б. Юсупов, Олий Мажлис Қонунчилик Палатаси депутати Ш.Раҳимовлар сўз олиб, мамлакатимизда Муҳтарам Президентимиз раҳбарликларида ёшларга оид давлат сиёсатини такомиллаштириш, ёшларнинг ҳуқуқ ва манфаатларини ҳимоя қилиш, уларни ҳар томонлама баркамол бўлиб вояга етиши учун шарт-шароитларни яратиш юзасидан кенг кўламли ислоҳотлар амалга оширилаётганлиги, ушбу ислоҳотларнинг мазмун-моҳиятини ёшларга тушунтириш ҳамда таклиф ва муаммоларини эшитиш, бартараф этиш ва амалий ёрдам бериш, мақсадида амалга оширилаётган ишларга алоҳида тўхталиб ўтдилар. 

Шундан сўнг  иштирокчиларнинг таклиф ва муаммолари мутасаддилар томонидан тингланди. Ёшлар томонидан билдирилган барча муаммолар ва таклифлар атрофлича муҳокама қилиниб, 17та мурожаатнинг 2таси жойида ҳал этилди. 15 таси эса тегишлилиги бўйича тумандаги мутасадди ташкилотлар раҳбарларига йўналтирилди.

ҚИШЛОҚ ХЎЖАЛИГИДА БИЛИМ ВА ИННОВАЦИЯЛАР МИЛЛИЙ МАРКАЗИ ТАШКИЛ ЭТИЛДИ

05.02.2021

“Қишлоқ хўжалигида билим ва инновациялар тизими ҳамда замонавий хизматлар кўрсатишни янада ривожлантириш тўғрисида”ги Президент Фармони (ПФ–6159-сон, 03.02.2021 й.) қабул қилинди.

 

Фармонга кўра, Қишлоқ хўжалиги вазирлиги ҳузурида Қишлоқ хўжалигида билим ва инновациялар миллий маркази ташкил этилди.

 

Миллий марказ барча турдаги давлат илмий ва ОТМнинг қишлоқ хўжалиги соҳасида амалга ошириладиган илмий-тадқиқот фаолиятини мувофиқлаштиради.

 

Қишлоқ хўжалиги соҳасида таълим, илм-фан ва ишлаб чиқаришнинг узвий интеграциясини таъминлаш бўйича Мувофиқлаштирувчи кенгаш фаолияти йўлга қўйилди.

 

Шунингдек, қуйидагилар ташкил этилади:

 

● 2021–2022 йилларда Миллий марказнинг Республика агрохизматлар маркази, Қорақалпоғистон Республикаси ва вилоятлар агрохизматлар марказлари;

● 2022 йилдан бошлаб босқичма-босқич қишлоқ туманларида Миллий марказнинг туман агрохизматлар марказлари.

 

Бундан ташқари, 2021 йил 1 мартдан, тажриба тариқасида, Миллий марказ тизимидаги илмий-тадқиқот муассасаларида тадбиркорларни жалб этган ҳолда кичик илмий-инновацион корхоналар ташкил этилади.

 

Фармон билан Қишлоқ хўжалигида билим ва инновациялар тизимини 2021-2025 йилларда устувор ривожлантириш концепцияси тасдиқланди.

 

Концепция доирасида, жумладан, Миллий марказ ҳузуридаги 100 дан ортиқ хизматларни кўрсатиш тизимини йўлга қўйиш назарда тутилган.

2021 йил “Ёшларни қўллаб-қувватлаш ва аҳоли саломатлигини мустаҳкамлаш йили Давлат дастури тасдиқланди

04.02.2021

Президент Фармони билан 2017–2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясини “Ёшларни қўллаб-қувватлаш ва аҳоли саломатлигини мустаҳкамлаш йили”да амалга оширишга оид Давлат дастури тасдиқланди. 

 

Фармон билан Ҳаракатлар стратегиясининг устувор йўналишлари бўйича амалга ошириладиган вазифалар, жорий этиладиган тартиб ва амалиётлар белгиланди. 

 

Давлат дастури 274 банддан иборат бўлиб, унда белгиланган тадбирларни амалга оширишнинг жами харажатлари 29,5 трлн сўм, 2,6 млрд доллар ва 57,5 млн еврони ташкил этади (мазкур миқдор 2020 йилда 18,2 трлн сўм ва 10,3 млрд АҚШ долларини ташкил этган).

КОСОНСОЙ ТУМАНИДА «МОНО МАРКАЗ»НИНГ ОЧИЛИШ МАРОСИМИ БЎЛИБ ЎТДИ

02.02.2021

Ўзбекистон Республикаси Президентининг “Қамбағал ва ишсиз фуқароларни тадбиркорликка жалб қилиш, уларнинг меҳнат фаоллигини ошириш ва касб-ҳунарга ўқитишга қаратилган ҳамда аҳоли бандлигини таъминлашга оид қўшимча чора-тадбирлар тўғрисида“ги қарорига мувофиқ республикамизининг кўплаб ҳудудларида моно марказлар ташкил этилмоқда.

Хусусан, аҳолини касб-ҳунарга ўқитиш мақсадида Косонсой туман 1-сонли касб-ҳунар мактабида ташкил этилган «моно марказ»нинг очилиш маросими бўлиб ўтди.

«Моно марказ»да меҳнат миграцияси йўли билан вақтинчалик меҳнат фаолиятини амалга ошириш учун хорижий мамлакатларга кетаётган фуқаролар ҳамда ишсиз хотин-қизларни касб-ҳунарга тайёрлаш, қайта тайёрлаш ва малакасини ошириш, хорижий тиллар ва тадбиркорлик кўникмаларини шакллантириш каби методик ва ташкилий ишлар амалга оширилади.

Маросимда Косонсой туман ҳокими Баҳодир Юсупов ҳамда туман Бандликга кўмаклашиш маркази бошлиғи З. Аҳмедов ҳамда Касбий таълимни ривожлантириш ва мувофиқлаштириш бошқармаси бошлиғи ўринбосари И. Жакбаровлар иштирок этдилар.

“НАМУНА” КИЧИК САНОАТ ЗОНАСИДА 1+1 ЛОЙИҲАСИ

01.02.2021

Янгича ёндашув. Бугун даврнинг талаби шундай. Аҳоли билан, хусусан, «Аёллар дафтари», «Ёшлар дафтари»га киритилган ҳамюртларимизни ҳар томонлама қўллаб-қувватлаш муҳим масалалардан саналади. Уларнинг бандлигини таъминлаш ҳам долзарб вазифалардан. Жойларда амалга оширилаётган ишлар ҳам бу саъй-ҳаракатларнинг амалдаги ифодаси.

4210 минг аҳолининг 111 минги ёшлар. Ёки Косонсой тумани бўйича аҳолининг 55 фоизини ёшлар ташкил қилади дегани. Уларнинг бандлигини таъминлаш, муайян касбга йўналтириш, бўш вақтини мазмунли ўтказиш устувор вазифалардан саналади. Бугун бу борада янги тизим жорий этилди. Яъни бир тадбиркорга бир нафар ёш бириктирилади. Бунда у ҳам иш билан таъминланади ҳам мавжуд билимларини мустаҳкамлаб боради.

Айни пайтда Косонсой туманининг "Гўрмирон" ҳудудида жойлашган 26 гектар майдонда ташкил этилган “Намуна” кичик саноат зонасида 210 млрд сўмлик 27 та лойиҳа амалга оширилмоқда. Бунинг натижасида 1700га яқин янги иш ўринлари яратиляпти. Эътиборли жиҳати, бу ерда ишбилармонлар ўз фаолиятларини бошлашлари баробарида ёшларга касб маҳорати ҳам ўргатилади. Яъни 1+1 лойиҳаси асосида. Муҳими, улар келгусида мустақил иш бошлашларида бу заминдир.

Улар тадбиркорга бириктирилиши натижасида ҳам ишга жойлашишади ҳам даромад топиш имкониятига эга бўладилар. Эътиборлиси, улар бир вақтнинг ўзида тажрибаларини ҳам орттиришади. Бу эса келгусида уларнинг мустақил фаолият бошларида "мактаб" вазифасини ўтайди.

 
© 2014-2021, Namangan viloyat Kosonsoy tuman hokimligining rasmiy axborot portali. Sayt materiallaridan foydalanilganda www.kosonsoy.uz manbasi ko'rsatilishi shart.
Sayt Namangan viloyati hokimligining Kompyuterlashtirish markazi tomonidan ishlab chiqilgan.