СИНОВНИ ТАФАККУР ВА ҚАТЪИЯТ БИЛАН ЕНГАМИЗ

26.04.2020

Халқимиз азал-азалдан оғир ва синовли дамларда юксак даражада қатъият ва сабр-бардош намунасини кўрсатиб келган.

Ана шундай сабр, қатъият ва матонат бугун янада ёрқин намоён бўладиган дамлар.

Давлатимиз оғир ва синовли, мураккаб вазиятда пандемияга қарши курашиш ва хавф оқибатларини бартараф этиш билан боғлиқ саъй-ҳаракатларга тезкорлик билан киришди.

Давлатимиз раҳбарининг оқилона сиёсати ва ташаббуси билан чартер рейслар орқали хорижий давлатлардаги фуқароларимиз юртимизга келтирилгани, карантин масканлари ташкил этилгани фикримиз далили.

Карантин масканларида, шунингдек, даволаш-профилактика муассасаларида кузатувга олинганларга, инфекция аниқланган беморларга, даволаш-профилактика чора-тадбирларини кўраётган тиббиёт ходимларига барча зарур ва қулай шарт-шароитлар яратиб берилди.

Бундай саъй-ҳаракатлар айни пайтда ҳам узвий ва изчил давом эттирилмоқда ва бир зум бўлса-да, сусайтирилгани йўқ.

Президентимиз раҳбарлигида ўтказилаётган видеоселектор йиғилишларида барча вазирлик ва идоралар, давлат қўмиталари, ҳокимликлар ва дахлдор тизимларга хавфни бартараф этиш борасидаги энг муҳим ва устувор вазифалар, топшириқлар берилиб, амалий ижроси доимий эътиборга олинмоқда.

Самара эса ўз-ўзидан касалликдан бутунлай тузалаётганлар сони ортиб бораётганида, карантин шароитида кузатувга олинган ҳамюртларимиз ўз уйларига, оилалари ва яқинлари бағрига қайтаётганида намоён бўлмоқда.

Шу ўринда Соғлиқни сақлаш вазирлиги томонидан қайд этилган рақам ва далилларга эътибор қаратиб ўтиш жоиз. Яъни, юртимизда коронавирус инфекциясига чалиниб, даволанаётган ўрта аҳволдаги ҳар бир бемор учун 32 миллион сўмдан, оғир аҳволдаги, жонлантириш бўлимидаги ҳар бир беморга ўртача 64 миллион сўм маблағ сарфланмоқда.

Карантинда бўлиб турган фкқароларнинг ҳар бири учун 14 кунлик карантин даврида 2,4 миллион сўмдан, коронавирусдан тузалиб, реабилитацияга олинган ҳар бир беморнинг тикланиши учун 2,8 миллион сўмдан маблағ йўналтирилмоқда.

Биргина шу рақамларнинг ўзиёқ давлатимиз бугунги оғир ва мураккаб вазиятда қанчалар инсонпарварлик кўрсатиб, ҳар бир юртдошимиз ҳаёти ва саломатлиги ҳақида жиддий қайғураётганини кўрсатиб турибди.

Шундай экан, хавфсизлик қоидаларига қатъий риоя қилиш, карантин қоидаларини бузмаслик, дезинфекция талаблари ва соғлом турмуш тарзини ҳаёт мезони билиб, синовли даврда уйда бўлишимиз, зарурат бўлмаганда кўчага чиқмаслигимиз зарур.

Вирусдан халос бўлаётганлар сони кун сайин ошаётгани ҳаммамизга куч бериши, Рамазон кунларида руҳий тарбияга алоҳида эътибор қаратишимиз зарур.

 

Анвархон ТЕМИРОВ,

Олий Мажлис Қонунчилик палатаси депутати,

ЎзХДП фракцияси аъзоси

ХИТОЙЛИК ШИФОКОРЛАР НАМАНГАНДА

22.04.2020

Мамлакатимизда бўлиб турган хитойлик шифокорлар гуруҳи бугун Наманган вилоятига ташриф буюришди. Хитойлик мутахассислар коронавирус инфекцияси тарқалишига қарши курашиш, касалликка чалинган беморларни самарали даволаш юзасидан олиб борилаётган ишлар билан танишишмоқда.

 

Онлайн тарздаги видеоконференция чоғида маҳаллий шифокорлар ва мутахассисислар билан мулоқот ўтказилди Ўзаро тажриба алмашув ва маслаҳатлашувларда коронавирус инфекциясини аниқлаш, унинг тарқалишининг олдини олиш, хасталик кузатилган инсонларни дарддан фориғ қилиш ва бошқа масалаларда фикрлашиб олинди.

ТОМОРҚА – РИЗҚ-РЎЗ МАНБАИ

20.04.2020

Шу кунларда бутун дунё халқлари қатори Ўзбекистон аҳли ҳам мураккаб ва синовли кунларни бошдан кечирмоқда. Коронавирус аталмиш зарарли офат ҳужумини бартараф этиш ҳамман6инг асосий мақсадига айланган. Ҳамма ерда карантин ва “ўзини ёлғизлаш” чоралари кўрилмоқда, касаллик аниқланган шахслар эса даволаниб, одатий ҳаёт бағрига қайтарилмоқда. Давлатимиз раҳбарияти шу билан бирга иқтисодда бўҳронга йўл қўймаслик, хусусан, аҳолининг озиқ-овқат маҳсулотларига бўлган эҳтиёжини тўла қондириш чора-тадбирларини кўрмоқда.

Бу сиёсатни кенг жамоатчилик қатори биз, депутатлар ҳам томонлама қўллаб-қувватласак, фойдадан холи бўлмайди. Халқ депутатлари Косонсой туман кенгашидаги мен етакчилик қилаётган “Адолат” СДП гуруҳи аъзолари ҳам бу борада изчил иш олиб бормоқдалар. Албатта, бунда карантин талабларидан келиб чиқиб, эҳтиёткорлик чораларини кўрган ҳолда иш олиб бормоқдамиз. Мақсад – аҳоли ўз томорқаси имкониятларидан қандай фойдаланишини аниқлаш. Бу борада бой тажриба тўплаган инсонларнинг иш усулларини кенг тарғиб қилиш, у ёки бу сабабга кўра кўнгилдагидай ҳосил ололмаётганларга ҳам тегишли ёрдам кўрсаатиш.

Кейинги икки кунда сайлов округим ҳудудидаги “Бешкетмон” ва “Қозоқовул” маҳалла фуқаролар йиғинларидаги ҳолатни ўргандим.  Аҳолининг кўпчилик қисми ҳозирги карантин кунларида ўз томорқасида иш билан бандлиги кишини қувонтиради. “Бешкетмон”да МФЙ раиси Ҳафиза Абдуғаффорованинг айтишига қараганда, 487 та хонадон мавжуд. Уларнинг ҳар бирида тўрт сотихдан ўн сотихгача экин майдони бор.

Масалан, Ҳасан Толқонов Бахт кўчасида истиқомат қилади. Унинг ҳовлисига кирган киши хонадон эгаси деҳқончилик илмидан яхши хабардор эканлигига ишонч ҳосил қилади. Бу ерда сабзавотлардан сабзи, пиёз, картошка экилган. Дуккаклилардан ловия ва нўхот яхши ривожланмоқда. Эгатларда биронта бегона ўт ёки кесак кўринмайди, тупроқ худди қум сингари юмшоқ ва майин. Ўз вақтида суғорилган ва чопиқдан чиқарилган. Бундай шароитда       экинлар баравж ривожланиши аниқ, албатта. Шу кўчадаги     Нурилло Мирзаалиев, Мамаризаев кўчасидаги Муҳибилло Мирзаев, Муҳаммаджон Усмоналиевнинг ҳовлиларидаги экин майдонларида ҳам ҳосилдорлик юқори бўлиши яхши кўзга ташланиб турибди.

“Қозоқовул” маҳалласида ҳам ўз томорқасини яшнатаётган миришкорлар талай экан. Айниқса, Илёс Холқўзиев иссиқхонада лимон етиштиришнинг ҳадисини олган. Бу ердан чиққан маҳсулот Косонсой ва Наманган бозорларида ўз харидорини тез топади. Чунки уларнинг кўриниши ниҳоятда чиройли, мазаси  барчага маъқул тушади. Заҳрохон Нишонова ва Лолахон Умматалиева ҳам ўз ихтиёрларидаги ер майдонларининг имкониятларидан унумли фойдаланмоқдалар. МФЙ раиси Умаржон Воҳидов бундай миришкорлар тажрибасини кенг ёйиш бўйича маҳалла фаоллари изчил иш олиб бораётганликларини айтди. Тез орада маҳалладаги 508 та хонадоннинг барчасида мўл-кўл мева-сабзавот маҳсулотлари етиштирилса, ажаб эмас.

Биз депутатлик гуруҳимиз аъзолари билан биргаликда тез орада ўзимизнинг сайлов округларимизда томорқалардан фойдаланиш масаласини муҳокама қилишни  маслаҳатлашдик. Тадбир, албатта, ҳозирги  шароитдан келиб чиқиб, вебинар усулда ўтказилади. Кейинчалик эса тумен кенгаши сессияси кун тартибига  киритишни режалаштирдик.

 

Исроил ЖЎРАЕВ,

халқ депутатлари Косонсой туман кенгашидаги “Адолат” СДП гуруҳи раҳбари.

 

ХАЛҚ ДЕПУТАТЛАРИ КОСОНСОЙ ТУМАН КЕНГАШИНИНГ ТЎРТИНЧИ СЕССИЯСИ БЎЛИБ ЎТДИ

19.04.2020

18 апрель куни халқ депутатлари Косонсой туман Кенгашининг навбатдаги тўртинчи сессияси бўлиб ўтди.

Сессия кун тартибидан биринчи масала сифатида туман аҳолисининг озиқ-овқат маҳсулотларига бўлган эҳтиёжи, мавжуд муаммолар ва уларни ҳал этиш чоралари юзасидан секторлар раҳбарларининг тақдимотлари ўрин олди. Бунда, шу йил 14 апрель куни Президентимиз раҳбарлигида бўлиб ўтган видеоселектор йиғилишида белгилаб берилган вазифалардан келиб чиқиб, туманда озиқ-овқат хавфсизлигини таъминлаш ва қишлоқ хўжалиги маҳсулотларини етиштириш ҳамда қайта ишлаш ҳажмини икки бараварга ошириш масалаларига алоҳида эътибор қаратилиб, муҳокамалар ўтказилди. 

Сессияда туман аҳолисининг озиқ-овқат маҳсулотларига бўлган эҳтиёжи, мавжуд муаммолар ва уларни ҳал этиш чоралари юзасидан секторлар раҳбарларининг тақдимотлари ўрин олди.

Шунингдек, сессия давомида туман ҳокимининг сессиялар оралиғида қабул қилган айрим қарорларини тасдиқлаш масалалари депутатлар иштирокида кўриб чиқилди.

Сессияда кун тартибидаги масалалар юзасидан Халқ депутатлари туман Кенгашининг тегишли қарорлари қабул қилинди.

 

Косонсой туман ҳокимлиги ахборот хизмати

ТОМОРҚА - ДАРОМАД МАНБАИ

17.04.2020

Муҳтарам Юртбошимиз Шавкат Мирзиёев раислигида жорий йилнинг 14 апрель куни ўтказилган видеоселектор йиғилишида қишлоқ хўжалиги тармоқларини янада ривожлантириш, озиқ-овқат маҳсулотлари ишлаб чиқариш ҳажмини ошириш масалалари бўйича олдимизга муҳим вазифалар қўйилди.

Йиғилишда Президентимиз аҳоли томорқасидан унумли фойдаланиши, бир йилда 2-3 марта ҳосил олиш чораларини кўриши зарурлигини таъкидлаб ўтдилар.

Ҳа, бугунги қалтис вазиятда томорқадан унумли фойдаланиш ҳар қачонгидан ҳам муҳим.

Ҳозирги синовли даврда томорқа ерларига экин экмаслик, қаровсиз ташлаб қўйиш юртга ва ерга нисбатан хиёнат эканлигини барчага аён.

Бугун косонсойлик барча кекса-ю ёш ер билан тиллашмоқда. Айниқса, куни-кеча ёққан ёмғир деҳқончилик ишларига айни муддао бўлди, десак янглишмаймиз. Боиси ерга қадалган барака уруғларининг бир текисда унишида унинг ўз ўрни бор, албатта. Ҳозирда кунда карантин қоидаларига амал қилган ҳолда аҳолига ҳар қарич ердан унумли фойдаланиш, рўзғор учун зарур полиз ва сабзавот экинларини экиш бўйича фуқаролар ўртасида тушунтириш ишлари олиб борилмоқда.

Шуни алоҳида таъкидлашимиз керакки, бугунги кунда унумдор тупроқли томорқаси бўлатуриб, ҳанузгача бирор турдаги экин экилмаган, бегона ўтлар босиб ётган, томорқасини қаровсиз қолдирган айрим фуқароларга дангасалик – камбағалликка олиб борувчи иллатдир, дегинг келади киши. Ахир, кафтдек томорқа – катта хазина-ку!

 

ВИЛОЯТ ҲОКИМИ НОРИН ТУМАНИДА ИЖТИМОИЙ-ИҚТИСОДИЙ ҲОЛАТ БИЛАН ТАНИШДИ

14.04.2020

Вилоят ҳокими Хайрулло Бозоров 14 апрель куни Норин туманида бўлиб, тумандаги кам таъминланган оилалар хонадонлари турмуш даражаси, аҳоли томорқаларидан самарали фойдаланиш ҳолати, ипак қурти етиштириш бўйича амалга оширилаётган ишлар билан танишди.

 

Ўрганиш жараёнида томорқа майдонларидан унумли фойдаланишни йўлга қўйган хонадонлар кўплиги эътироф этилди, бироқ томорқасидан самарали фойдаланмаётган, ҳалигача экин экмаган, қаровсиз қолдирган хонадон эгалари ҳам мавжудлиги танқид қилинди.

 

Кам таъминланган, эҳтиёжманд оилалар хонадонларида уларнинг турмуши билан танишиб, пандемия ҳолатида озиқ-овқат ва бирламчи эҳтиёж маҳсулотлари билан таъминланиш даражаси ўрганилди. Бу оилаларга озиқ-овқат маҳсулотлари таркатилди.

 

Тумандаги мактаблар, мактабгача таълим ташкилотлари ва коллежлар каби ижтимоий соҳа объектлари ҳудудларидаги ер майдонларини ҳам экин экилишини таъминлаш бўйича кўрсатмалар берилди.

 

Норин туманида ипак қурти тарқатилиши ҳам жадал олиб борилаётгани кўзга ташланди. Бир қути ипак қурти олган хонадонга кластерлар томонидан 25 кг ун ҳамда 5 кг ёғ аванс тариқасида олдиндан берилаётгани, аҳоли томонидан ипак қурти боқишга бўлган қизиқишни янада ортирмоқда.

НАМАНГАНДА ХАЙРИЯ ИШЛАРИНИ МУВОФИҚЛАШТИРУВЧИ МАРКАЗ ФАОЛИЯТИ ОНЛАЙН ДАСТУР БИЛАН МУВОФИҚЛАШТИРИЛАДИ

13.04.2020

Эҳтиёжманд ва ночор оилаларга мўлжалланган хайрияларнинг ва ҳомийликларнинг аниқ ҳисоб-китобини онлайн юритиш имконини берувчи дастур ишга туширилди

Коронавирус пандемияси даврида Наманган вилоятида эҳтиёжманд ва ночор оилаларга мўлжалланган хайрияларнинг ва ҳомийликларнинг аниқ ҳисоб-китобини онлайн юритиш имконини берувчи дастур ишга туширилди.

 

Ушбу дастур Наманган вилоят ҳокимлиги АКТ ривожлантириш маркази, вилоят Маҳалла ва оилани қўллаб-қувватлаш бошқармаси қошида ташкил этилган Хайрия ишларини мувофиқлаштирувчи марказ, Бирлашган Миллатлар Ташкилоти Тараққиёт дастурининг (БМТТД) Ўзбекистондаги ваколатхонаси ҳамда DataSite Technology компанияси ҳамкорлигида, БМТ Тараққиёт дастурининг Ўзбекистондаги ваколатхонаси беғараз кўмаги билан республика вилоятларида биринчи бўлиб ишга туширилди.

 

Унинг ёрдамида вилоят миқёсида келиб тушган ҳомийлик маблағлари ва маҳсулотлари, 1197 рақами орқали Хайрия ишларини мувофиқлаштирувчи марказга келиб тушган мурожаатлар, амалга оширилган хайриялар рўйхати билан онлайн тарзда ҳисобот юритиш имкони яратилди.

 

НАМАНГАН ВИЛОЯТИ СОҒЛИҚНИ САҚЛАШ БОШҚАРМАСИНИНГ БИЛДИРИШИ

11.04.2020

Наманган аҳолиси диққатига!

 

Азиз ҳамюртлар!

 

Сизларга маълумки, бугунги кунда коронавирус инфекциясига қарши кураш давом эттирилмоқда.

 

Кўрилаётган чоралардан мақсад - коронавирус инфекцияси тарқалишининг олдини олиш ва эпидемиологик вазият барқарорлигига эришишдан иборат.

 

Агарда Сизнинг ёки оила аъзоларингиздан бирининг ТАНА ҲАРОРАТИ кўтарилиши кузатилса,  зудлик билан

тез тиббий ёрдам хизмати

103 га ёки

78-223-13-22,

78-223-13-24

рақамларига қўнғироқ қилинг!

 

Малакали шифокорлардан таркиб топган тиббий бригадалар қисқа фурсатда хонадонингизга етиб бориб, зарур тиббий хизмат кўратишади.

 

САЛОМАТЛИК ПОСБОНЛАРИ СИЗ УЧУН ТУНУ КУН ХИЗМАТДАЛАР.

 

СИЗ ЭСА УЙДА ҚОЛИНГ!

 

НАМАНГАНДА ҲАМ ТЎРТ НАФАР БЕМОР КОРОНАВИРУСДАН БУТУНЛАЙ СОҒАЙДИ

10.04.2020

Наманган вилоятида ҳам коронавирус инфекциясига қарши изчил кураш олиб борилмоқда. Карантин тадбирлари қатъий йўлга қўйилган.

Вилоят юқумли касалликлар шифохонасида коронавирусга чалинган беморлар стандартлар бўйича даволанмоқда. Фидойи ва ватанпарвар шифокорларимиз уларни дарддан халос қилиш учун туну кун ишламоқда.

Бунинг натижасида бугун Наманганда коронавирусни юқтирган тўрт киши бутунлай соғайиб, реабилитацияга олинди.

Улар вилоят соғлиқни сақлаш бошқармаси бошлиғи, тиббиёт фанлари номзоди Солижон Мўминов ва бошқа масъуллар томонидан вилоят реабилитация марказига кузатиб қўйилди. Касалликдан тузалган фуқаролар маълум муддат шу ерда карантинда бўлишади.

Маълумот ўрнида, ҳозирга қадар юртимизда коронавирусга чалинган беморларнинг 42 нафари тўлиқ соғайди.

ҲУРМАТЛИ КОСОНСОЙЛИКЛАР!

09.04.2020

Туманимизда Ҳомийлик хайрияларини мувофиқлаштириш маркази ишга тушди. Ушбу марказ тадбиркорлар ва саховатпеша фуқаролардан келган хайрия маблағлари, озиқ-овқат ва қишлоқ хўжалиги маҳсулотларини эҳтиёжманд оилаларига тақсимлаш билан шуғулланмоқда.

Марказ қошида Call-center ташкил этилган бўлиб, операторлар соат 9:00 дан 17:00 гача мурожаатларни қабул қилмоқда. Агар карантин шароитида қийналаётган, рўзғорингизда етишмовчилик сезилаётган бўлса, ёки ҳомийлик қилмоқчи бўлсангиз операторларнинг телефон рақамларига қўнғироқ қилинг.

Туманимиздаги тадбиркорлар ва мурувватли фуқаролар ҳисоб рақамига маблағ кўчириш, пластик карта орқали пул ўтказиш, нақд пул, озиқ-овқат ва қишлоқ хўжалиги маҳсулотлари кўринишидаги хайриялар учун мурожаат этишлари, ҳозирги синов даврида савоб қозонган инсонлар қаторига қўшилишлари мумкин.

Унутманг, бугун қилган яхшилигингиз, эртага ўзингига ўн баробар бўлиб қайтади.

Биз бепарво эмасмиз, биз меҳр улашамиз!

 

“Ҳомийлик жамғармаси”нинг ҳисоб рақамлари:

 

Ҳ/р: 2021 2000 6005 3302 1001

 

ИНН: 202 038 317

 

МФО: 01049

 

Банк: Микрокредитбанк АТБ Косонсой бўлими

Олувчи: Махдуми Аъзам жамғармаси;

Тўлов мақсади: Эҳтиёжманд оилалар учун ҳомийлик маблағи

 

Пластика карта орқали маблағ ўтказиш:

8600 0529 2421 0394 (Мақсудов Раимжон)

 

Ҳомийлик штабининг телефон рақамлари:

69 653 42 01

69 653 42 03

99 302 74 34

 

Косонсой тумани ҳокимлиги ахборот хизмати

 
© 2014-2020, Namangan viloyat Kosonsoy tuman hokimligining rasmiy axborot portali. Sayt materiallaridan foydalanilganda www.kosonsoy.uz manbasi ko'rsatilishi shart.
Sayt Namangan viloyati hokimligining Kompyuterlashtirish markazi tomonidan ishlab chiqilgan.