Шавкат Мирзиёев: Наманганга ўттиз йиллик тарихда бунча маблағ келмаган

19.02.2021

 

Халқ депутатлари кенгашининг сессиясида Наманган вилоятини ҳар томонлама ривожлантириш чора-тадбирлари муҳокама қилинди.

Давлат раҳбари аҳоли бандлиги ва даромадини ошириш, камбағалликни қисқартириш биринчи муҳим вазифа эканини таъкидлади. “Маҳаллабай” тизимда тадбиркорликни ривожлантириш учун 850 миллиард сўм кредитлар ажратишга кўрсатма берилди.

Шунингдек, Тикланиш ва тараққиёт жамғармасидан вилоятга 60 миллион доллар ажратилиши айтилди. Бунинг ҳисобидан Наманган шаҳри иссиқлик тизимини қайта қуришга 15 миллион доллар, эски шаҳар инфратузилмасини яхшилаш ва каналлар қирғоқларини ободонлаштиришга 10 миллион доллар, маҳаллалардаги драйвер лойиҳаларни молиялаштиришга 10 миллион доллар, лимончиликни ривожлантиришга 10 миллион доллар йўналтирилади. Кичик ва ёшлар саноат зоналарига, ички ва зиёрат туризмини ривожлантиришга, кредитлар фоизининг бир қисмини қоплашга 5 миллион доллардан берилади.

Наманган вилоятида 2021-2022 йилларда умумий қиймати 23 триллион 700 миллиард сўмлик инвестиция лойиҳалари амалга оширилиши қайд этилди. Ушбу 1 минг 728 та лойиҳа орқали 66 мингдан зиёд иш ўрни яратиш режалаштирилган.

—Наманганга ўттиз йиллик тарихда бунча маблағ келмаган. Агар шуни тўғри, самарали йўналтириб ишлатсак, вилоятнинг иқтисодиёти жадал ривожланади, ҳамма туманларга саноат кириб боради, одамлар ишли бўлади, — деди Шавкат Мирзиёев.

Қишлоқ хўжалигини ривожлантириш, экинлар таркибини ўзлаштириш муҳимлиги таъкидланди. 17 минг гектар ер ажратиб, 200 минг нафар ёш, пахта кластерлари томонидан ҳар бир туманда тикувчилик корхоналарини ишга тушириб, 10 минг нафар аёллар бандлигини таъминлаш вазифаси белгиланди.

Янгиқўрғон картошкачилик маркази, Венгрия билан ҳамкорликда картошкачилик йўналишида илмий-тадқиқот институти ташкил этиш бўйича мутасаддиларга топшириқ берилди.

Ижтимоий инфратузилмани ривожлантириш масалаларига ҳам алоҳида эътибор қаратилди. Бу йил вилоятда 160 километр ичимлик суви ва 11 километр оқова тармоқлари қуриш учун бюджетдан 59 миллиард сўм ҳамда Тикланиш ва тараққиёт жамғармасидан қўшимча 100 миллиард сўм ажратилиши маълум қилинди. Бунинг натижасида яна 167 минг нафар аҳоли тоза ичимлик сув билан таъминланади.

Президент ёшлар билан алоҳида суҳбатлашди. Улар айтган таклифларни, бизнес-режаларини қўллаб-қувватлаб, мутасаддиларга тегишли кўрсатмалар берди.

—Ёшларнинг кўзида эртанги кунга ишонч кўрсам, очиғи, ҳамма чарчоқларим чиқиб кетади! Мана шундай билимли, жонкуяр, изланувчан ёшлар ҳамма соҳаларда ўзгариш қилади. Биз уларга кенг йўл очиб, ҳар томонлама ёрдам беришимиз керак, —деди давлат раҳбари.

Наманганда бир нечта дастурни ўз ичига олган мега лойиҳа амалга оширилади

19.02.2021

 

Бош вазир ўринбосари, инвестициялар ва ташқи савдо вазири Сардор Умрзоқов халқ депутатлари Наманган вилояти кенгашининг сессиясида вилоятда амалга ошириладиган йирик инвестиция лойиҳалари ҳақида маълумот берди.

– Наманган вилоятида мега лойиҳа устида иш бошладик. Мазкур мега лойиҳа 750 миллион долларлик 15 та лойиҳани ўз ичига олган. Бу лойиҳалар ишга туширилгач, вилоят иқтисодиёти анча яхшиланади.

Энг асосийси, Наманганда ушбу лойиҳаларни амалга оширувчи ташаббускорни топиш муаммо бўлмади. Наманган халқида салоҳият, имконият, хоҳиш бор. Тадбиркорлик кўникмаси ва масъулияти юқори.

Ёшлар тадбиркорлигини ривожлантириш мақсадида вилоятда 19 та ёшлар саноат ва тадбиркорлик зоналарини ташкил этиш режалаштирилган. Айни пайтда Давлатобод, Косонсой, Тўрақўрғон туманларида ишлар бошлаган. Худди шундай бошқа туманларда ҳам иш олиб борилади.

Вилоятда тўқимачилик, чарм-пойабзал, электротехника, фармацевтика, қурилиш материаллари каби драйвер соҳалар бўйича “ўсиш нуқталари” белгилаб олинди, деб маълум қилди С.Умурзоқов.

Янги тизим бўйича 775 та маҳаллага саноат лойиҳалари олиб кирилади.

Шавкатжон Абдураззақов Наманган вилояти ҳокими этиб тасдиқланди

19.02.2021

 

Халқ депутатлари Наманган вилоят кенгашининг навбатдан ташқари сессиясида Шавкатжон Абдураззақов вилоят ҳокими этиб тасдиқланди.

Давлат раҳбарининг номзод юзасидан таклифи депутатлар томонидан бир овоздан маъқулланди.

Шавкатжон Абдураззақов сессияда сўзга чиқиб, билдирилган ишонч учун давлат раҳбари ва депутатларга миннатдорлик билдирди.

—Ватанимга унинг аҳолисига ота-онамга хизмат қилгандек хизмат қиламан, — деди Шавкатжон Абдураззақов.

«Наманганликлар тартиб-интизомни яхши кўради» — Шавкат Мирзиёев

19.02.2021

 

Президент Шавкат Мирзиёев Наманган вилоятини ва унинг аҳолисини нега бошқа ҳудудларга намуна сифатида кўрсатиши ҳақида гапирди.

«Наманганликларда тадбиркорлик, бирлашиш, натижага ишлаш деган одат бор. Иш услуби маданияти жуда юқори», — деди у.

Давлат раҳбари пандемия даврида вилоятнинг ялпи ишлаб чиқиши 5 фоиздан ошганини қайд этиб, «ҳеч қайси вилоятда бундай натижа бўлмаганини» айтди.

Ўзбекистон Президенти Наманган шаҳридаги «Ишга марҳамат» мономарказида журналистлар саволига жавоб берди. У Наманган вилоятини бошқа ҳудудларга намуна сифатида кўрсатишининг сабабларига тўхталди.

Президент доим Наманган вилояти ҳамда унинг халқи ҳақида ўзгача меҳр билан гапириши ва бошқа ҳудудларга намуна қилиб кўрсатишининг сабаблари ҳақидаги саволга қуйидагича савол берди.

«Ҳақиқатан кўп учрашувларда, ҳар бир селектор йиғилишида Наманганни бошқа вилоятларга ибрат қилиб кўрасатаман. Бу вилоят билан Фарғонани таққослаб, таҳлил қилиб кўрайлик. Фарғонада нефтни қайта ишлаш заводи, „Фарғонаазот“ каби катта-катта корхоналар бор. Наманганда-чи? Умуман йирик корхоналар йўқ. Афсуски, 30 йил ичида бу вилоятда мақташга арзигулик катта корхоналар қурмадик», — деди
Президент.

Президент Наманган аҳолисини нега мақташига ҳам тўхталди.

«Наманганликлар тартиб-интизомни яхши кўради, уларда тадбиркорлик, бирлашиш, натижага ишлаш деган одат бор. Иш услуби маданияти жуда юқори. Охирги йилларда вилоят раҳбарлари тадбиркорларга давлат берган имкониятларни етказишда замон талабига муносиб ишлаяпти, тадбиркорлар ишонган», — деди Шавкат Мирзиёев.

Давлат раҳбари бошқа вилоятларда солиқнинг асосий қисмини йирик корхоналар бажаришини, Наманганда эса ўрта ва кичик бизнес бу вазифани бажаришини таъкидлади.

«Ўтган йили пандемия пайтида вилоятнинг ялпи ишлаб чиқариши 5 фоиздан ошди, саноат улуши 16 фоиз бўлди. Ҳеч қайси вилоятда бундай натижа бўлгани йўқ».

«Мен албатта, Наманган халқининг меҳнати, ҳаракатлари ва натижасига қараб, уларни мақтайман, муносиб рағбатлантираман ва ҳар доим ибрат сифатида кўрсатаман», — деди Президент.

Президент ёшларга: Йўлларингизни топиб, бирингизни икки қилиб, фарзандлар камолини кўриб яшасаларингиз - менинг энг катта мақсадим шу

18.02.2021

 

Ўзбекистон Президенти Шавкат Мирзиёев 18 февраль куни Наманган вилоятининг Янгиқўрғон туманига келди.

 

Давлатимиз раҳбари ўтган йили июнда вилоятда бўлганида Косонсой, Чортоқ, Янгиқўрғон туманларини боғдорчиликка ихтисослаштириш яхши самара беришини айтган эди. Жорий йил 11 январда эса «Наманган вилоятининг Косонсой, Чортоқ ва Янгиқўрғон туманларида мева-сабзавотчилик ва узумчиликни ривожлантириш чора-тадбирлари тўғрисида» Президент қарори қабул қилинди.

 

Шунга мувофиқ, ушбу тоғли туманларда замонавий боғ ва токзорлар ташкил этилмоқда.

 

Улардан бири — Янгиқўрғондаги “Sura General Investments” масъулияти чекланган жамиятининг боғи. Бу ер илгари суғорилмас, шу сабабли ундан унумли фойдаланилмас эди. Бирлашган Араб Амирликларининг 3 миллион доллар тўғридан-тўғри хорижий инвестицияси ҳисобига 103 гектар майдонда интенсив боғ барпо этилди.

 

Аввало, 250 метр чуқурликдан сув чиқарилди. Ҳовуз қазилиб, томчилатиб суғориш тизими ўрнатилди. Ўтган йили Италиядан кўчатлар олиб келиниб, 48 гектарга гилос, 26 гектарга ўрик, 22 гектарга шафтоли, 7 гектарга олхўри экилди.

 

Президентимиз боғнинг иқтисодий самарадорлиги билан қизиқди. Бу ердаги меваларнинг ҳосилдорлиги оддий усулдагисига нисбатан 3 баробар юқори. Навлари ҳам бозорбоп. Томчилатиб суғориш тизими натижасида ҳар гектар ердан 2 баробар кўп сув иқтисод қилиш мумкин.

 

Дарахтлар келгуси йили ҳосилга киради. Боғнинг йиллик қуввати 5 минг тонна бўлади. 4 миллион долларлик маҳсулот экспорт қилиш режалаштирилган. Корхона яна минг гектарда боғ яратишни мақсад қилган.

 

Боғда 40 киши иш билан таъминланган. Қатор ораларида сабзавот етиштириш учун ишсиз ёшларга ер бўлиб берилган.

 

Давлатимиз раҳбари шундай ёшлар билан суҳбатлашди.

 

 Сизларнинг ишли бўлганларингни, кайфиятларингни кўриб хурсандман. Йўлларингизни топиб, иш билан бўлиб, бирингизни икки қилиб, фарзандлар камолини кўриб яшасаларингиз - менинг энг катта мақсадим шу. Бунинг учун шу билан чегараланмай, кўпроқ билим олишингиз, янги марраларга интилишингиз керак, - деди Шавкат Мирзиёев.

 

Илгари наманганлик 160 минг киши хорижга иш излаб кетгани, бугун яратилаётган имкониятлар натижасида 100 минги юртимизга қайтиб келгани таъкидланди.

 

— Ёшлар йўлини тасаввур қилолса, куч пайдо бўлади. Қийинчиликлардан, синовлардан хафа бўлмаслик керак. Ҳаёт мактабини ўтаган инсон дунёга бошқача қарайди. Ёшларнинг яхшисиям, ёмониям бизнинг фарзандларимиз. Сизларга ўхшаган интилувчан, эртанги кунига бефарқ бўлмаган, касб-ҳунарли ёшлар бошқа тенгдошларига ўрнак бўлиши керак, - деди Президент.

 

Давлат раҳбари интенсив боғнинг инвестори билан мулоқотда бўлди.

 

Шу ерда Наманган вилоятида қишлоқ хўжалиги соҳасида амалга ошириладиган лойиҳалар тақдимоти ўтказилди.

КИМЁ САНОАТИ КОРХОНАЛАРИ РИВОЖЛАНТИРИЛАДИ

17.02.2021

 

“Кимё саноати корхоналарини янада ислоҳ қилиш ва молиявий соғломлаштириш, юқори қўшилган қийматли кимёвий маҳсулотлар ишлаб чиқаришни ривожлантириш чора-тадбирлари тўғрисида”ги Президент қарори қабул қилинди.  

 

Қарорга кўра, кимё саноатини трансформация қилишнинг узоқ муддатли асосий муҳим йўналишлари белгиланди.

 

2021 йилдан янги ишлаб чиқариш қувватларини яратишда асосан хусусий, шу жумладан хорижий инвесторлар ва технологик шерикларни жалб қилишни назарда тутувчи “Кимё ва газ-кимё саноатида технологик кластерларни яратиш бўйича очиқ ҳамкорлик дастури” жорий этилди.

 

Қарор билан қуйидагилар тасдиқланди:

 

Ўзбекистоннинг 2021–2023 йилларга мўлжалланган инвестиция дастурига киритилган ва амалга ошириш муддатлари жадаллаштириладиган инвестиция лойиҳаларининг рўйхати;

 

умумий қиймати 1 176 млн АҚШ долларга тенг, шундан 700 млн АҚШ доллари тўғридан-тўғри хорижий инвестициялар ва кредитлар ҳисобидан молиялаштириладиган 2021–2025 йилларда кимё корхоналарида ишлаб чиқаришни диверсификация қилиш, мавжуд хомашё базасидан самарали фойдаланиш орқали юқори қўшимча қийматга эга бўлган кимёвий маҳсулотларнинг янги турларини ишлаб чиқаришни ташкил этишга қаратилган 16 та янги инвестиция лойиҳалари рўйхати.

 

Қарорга кўра, маҳаллий хомашё ресурсларини чуқур қайта ишлаш ва тармоқлараро кооперацияни ташкиллаштириш, экспортбоп ва импорт ўрнини босувчи маҳсулотлар ишлаб чиқаришни назарда тутувчи хусусий ва хорижий инвесторлар иштирокида амалга ошириладиган лойиҳаларга устуворлик берилади.

 

Шунингдек, 2024 йилга қадар “Ўзкимёсаноат” АЖ корхоналарида ишлаб чиқариш ва бошқарув жараёнларини, молиявий, хўжалик ва ташкилий фаолиятни бошқариш ва мониторинг қилиш, ишлаб чиқарилган товарларни сотиш, етказиб бериш ва улардан фойдаланишни назорат қилишнинг автоматлаштирилган тизими жорий қилинади.

КОСОНСОЙДА ЯНА 199 НАФАР ЁШЛАРГА ЕР МАЙДОНИ БЕРИЛДИ

16.02.2021

 

Косонсой туманида ёшлар бандлигини таъминлаш, уларни молиявий қўллаб-қувватлаш борасидаги ишлар давом эттирилмоқда. Айни йўналишдаги ишлар кўламини ер эгасига айланаётган ёш деҳқонлар сафи тобора кенгайиб бораётгани мисолида ҳам кўришимиз мумкин.

Жумладан, бугуннинг ўзида “Ҳуррият 1”, “Гулистон 2”, “Обод”, “Сой бўйи”, “Гузар”, “Чўнгбош”, “Такаранг”, “Тагижар”, “Боғишамол 2”, “Олмазор”, “Баҳористон” маҳаллаларида яшовчи яна 199 нафар ишсиз ёшларга “Қорасув серҳосили”, “Ҳур Шерзод Исфандиёр”, “Коинот юлдузи”, “Пушти тепа” фермер хўжаликларидан 27,45 гектар ер майдони ажратиб берилди ва туман сектор раҳбари ҳамда тегишли мутасаддилар иштирокида сертификатлар топширилди. Ерга эгалик қилиш ҳуқуқини берувчи сертификатларни қабул қилиб олган ёшларнинг 51 нафари туман ҳокими, 56 нафари туман прокурори, 42 нафари туман ички ишлар бўлими, 50 нафар туман давлат солиқ инспекцияси бошлиғи секторларига тўғри келади.

«НАМУНА»ДА КИЧИК САНОАТ ЗОНАСИДА ИШЛАР ҚИЗҒИН ПАЛЛАГА КИРМОҚДА

15.02.2021

 

Туманимизда кичик саноат зоналарини ташкил этиш орқали корхоналарнинг ишлаб чиқариш қувватини кучайтириш, янги иш ўринлари яратишга алоҳида эътибор қаратилмоқда. Ҳозиргача бир неча ана шундай ҳудудлар жорий қилинди. Янги йилда яна бир – “Намунс” кичик саноат зонаси (КСЗ)ни барпо қилишга киришилди.

 

Ер майдони 26,2 гектардан иборат бўлган КСЗда умумий қиймати 206 млрд. 700 млн. сўмликдан иборат 28 та лойиҳани руёбга чиқариш кўзда тутилган. Шунингдек, лойиҳаларда режалаштирилган ишларни амалга ошириш учун 2 млн. 500 минг АҚШ доллари қийматидаги хорижий инвестиция киритилади. Энг асосийси, барча тизим тўла увват билан ишга тушса, 1 минг 790та иш ўринлари яратилади.

Мақзкур ҳудудда автомобиль ва чарм саноати йўналишларида биттадан, қурилиш ва озиқ-овқат йўналишларида 5 тадан лойиҳани ойўлга қўйиш режалаштирилган. Шунингдек, текстил ва трикотаж ишлаб чикариш, ёғч маҳсулотларини қайта ишлаш ҳамда маиший маҳсулотлар тайёрлашни йўлга қўйиш ҳам ўрин олган.

 

Айни пайтда “Намуна”да дастлабки ишларга киришилди. Яъни ерларни тайёрлаш ва сув чиқариш учун қудуқлар қазилмоқда. “Водий индустрия қурилиш сервис” МЧЖ томонидан 716 метрли 114 ммли газ қувурлари тортилди. Туман электр тармоқлари корхонаси томонидан эса 7,0 км узунликда ҳаво электр тармоқлари ҳам тортилди.

 

Ҳозирги кунда “Баркас текс“ МЧЖ томонидан пахтани қайта ишлаб, калава ип ва момик сочиқ, ишлаб чиқаришни ташкил этиш лойиҳаси бўйича ер ишлари ҳамда бетон қўйиш ишлари амалга оширилмоқда. “Чиндовул қурилиш инфо” МЧЖ учун ажратилган ҳудудда эса қурилиш материаплари ишлаб чиқаришни йўлга қўйиш мақсадида айни шундай юмушлар якунланиб, девор қад ростламоқда. Қолаверса, “Орзу товел текс” МЧЖ, “Фирдавс озод диёри” МЧЖ ҳудуларида ҳам бунёдкорлик ишлари қизғин паллага кирмоқда.

“АФҒОНЧИ”ЛАР БИЛАН УЧРАШУВ

15.02.2021

Косонсой туманидаги миллий маданият марказида туман ҳокими ўринбосари А.Шералиев қўшни Афғонистонда ўз ҳарбий бурчини ўтаб, туманимизнинг турли ҳудудларида истиқомат қилаётган собиқ “афғончи”лар билан учрашди.

15 февраль - Қўшинларнинг Афғон тупроғидан ўз юртларига қайтарилган куни - Ветеран ЖАНГЧИЛАР куни сифатида нишонланади.

Собиқ иттифоқ қўшинининг Афғонистондан чиқарилганига 32 йил тўлиши муносабати билан ўтказилган тадбирга Афғонистонда ўз байналминал бурчини ўтаб қайтган фуқаролар таклиф этилди.

Тадбирда ёшларни ватанпарварлик, она Ватанга садоқат руҳида тарбиялашда кўрсатаётган алоҳида жонбозлиги учун бир қатор “афғончилар” туман ҳокимлигининг ташаккурнома ҳамда эсдалик совғалари билан тақдирланишди.

 

Учрашув давомида туман маданият бўлими томонидан ташкил этилган концерт дастури барча йиғилганларга илиқ таассурот қолдирди.

КОСОНСОЙ – МЕВА-САБЗАВОТГА КОН

15.02.2021

 

Косонсой деганда кўпчиликнинг кўз олдида  баланд-паст қир-адирлар бағрида ястаниб ётган, табиатан гўзал шаҳар ва қишлоқлар, бепоён пахтазор, ғаллазору боғлар, яйловлар  гавдаланади. Бу маконда яшаб, меҳнат қилиб тўкинчилик яратаётган фермер ва деҳқонлар тасарруфида 19 минг 866 гектар қишлоқ хўжалиги фойдаланишида бўлган ер майдонлари

бор. Улар дунё халқлари учун оғир кечган пандемия даврида ҳам фидокорона меҳнат қилди.

Якунланган 2020 йилда 3955 гектарда пахта, 8170 гектарда ғалла парвариши йўлга қўйилди ва режа уддаланди. 4428 гектар майдондаги боғ, узумзор, сабзавот ва полиз майдонларидан 56,1 минг тонна  экспортбоп ҳосил етиштирилди. Ялпи ишлаб чиқарилган маҳсулот ўтган йилга нисбатан 104 фоизни ташкил этди. 101 гектар ерда замонавий интенсив боғ ташкил қилинди.

 

Юқорида таъкидланганидек, туманда мавжуд ер майдонларининг бир қисмини қир-адирлик, шартли суғориладиган ерлар ташкил этади. Бундай шароитда деҳқончилик қилиш, кўзланган ҳосилни олиш учун паст текисликдагидан бир неча баробар кўп маблағ сарф қилиш, реза-реза тер тўкишга тўғри келади. Сув ресурслари таъминотидаги етишмовчилик ва муаммолар ҳисобига ўз-ўзидан кўзда тутилган ҳосил етиштирилмасдан, фермер хўжаликлари кўп миқдорда иқтисодий зарар кўради. Мисол учун ғалла экин еридан қисқартирилган 3000 гектар майдонга ғалла учун қилинган харажатлар ҳамда олинган даромад ҳисоб китоб қилинганида, 1 гектар ерга 8 миллион 715 минг сўм харажат қилингани, ўртача ҳосилдорлик 25 центнерни ташкил этгани маълум бўлди. Ёки ҳар гектаридан 2 миллион 465 минг сўм зарар кўрилди. Жами 3 минг гектардан кўрилган зарар миқдори туман бўйича 7 миллиард 395 миллион сўмни ташкил этди.

Президентимиз ўтган йилнинг 26-27 июнь кунлари вилоятимизга қилган ташрифи чоғида

Косонсой, Чортоқ ва Янгиқўрғон туманларини мева-сабзавотчиликка ихтисослаштириш бўйича қатор вазифаларни белгилаб берган эдилар. Бу борада қисқа фурсат ичида истиқболли режалар тузилди, таклифлар берилди. Яқинда Косонсой, Чортоқ ва Янгиқўрғон туманларида мева-сабзавотчилик ва узумчиликни ривожлантириш чора-тадбирлари тўғрисида Президент қарори қабул қилинди. Бу албатта, фидойи ва захматкаш косонсойликларга жуда катта имконият эшиклари очиб берилганидан далолатдир. Мавжуд ер майдонларидан самарали фойдаланиш, ресурстежамкор технологияларни жорий этиш ҳисобига харажатларни камайтириб, даромадни ошириш юзасидан 2021-2022 йилларга мўлжалланган комплекс чора-тадбирлар дастурини ишлаб чиқдик. Бунда ҳудудларни ихтисослаштириш тартибига қатъий риоя этган ҳолда лойиҳа ташаббускорлари билан талаб этиладиган маблағлар, уларни қоплаш манбалари, моддий ресурслар таъминоти, ишга тушириладиган янги қувватлар ҳамда яратиладиган иш ўринлари аниқ ҳисоб-китоб қилинди. Жумладан, 2021 йилда ғалладан 2413 гектар майдон қисқартирилади. Унинг ўрнида 463 гектар интенсив боғ, 250 гектар токзор барпо этилади. 550 гектарга сабзавот, 250 гектарга картошка, 550 гектарга дуккакли ва 350 гектарга мойли экинлар жойлаштирилади. Талаб этиладиган моддий ресурслар, ишлаб чиқариладиган маҳсулот ҳажми ва ишлатилиши  манзилли дастурларга асосан амалга оширилади. 2021 йилда ушбу лойиҳаларни амалга ошириш ҳисобига мазкур майдонларда

9 минг 200 тонна мева, 2 минг 500 тонна узум, 13 минг 700 тонна сабзавот, 4 минг 500 тонна картошка, 1 минг 100 тонна дуккакли маҳсулотлар, 700 тонна мойли маҳсулотлар етиштириш имконияти яратилади. Етиштирилган маҳсулотларнинг 10 минг 700 тоннаси экспортга йўналтирилади. Лойиҳаларни амалга ошириш ҳисобига 700 та янги иш ўрни яратилади.

Янги ташкил этиладиган лойиҳалардан  бири  бўлган “Кosonsoy dry fruits” қўшма корхонасида Польша билан ҳамкорликда 300 гектар майдонда интенсив боғ барпо этилади.

Умумий қиймати 44 млрд. сўмни ташкил этган мева-сабзавотларни қайта ишлаш, сақлаш, қуритиш, иссиқхона ва музлатгичларни ишга тушириш лойиҳалари амалга оширилади, инвестиция маблағлари жалб этилади. Айни кунларда мазкур лойиҳа доирасида Бельгия, Хитой, Россия, Словакия, Италия каби ривожланган мамлакатлар билан ҳамкорлик қилиб  келаётган Люблин университетининг туманда филиалини очиш, малакали кадрлар ўқитилишини йўлга қўйиш мўлжалланмоқда. Бундан ташқари, “Isparon Livestok and Greenhaus”, “Косонсой инновацион ғоялари” фермер хўжаликлари ва “Уйчи Дрипп” МЧЖ томонидан 480 гектар майдонда тўлиқ томчилатиб суғориш технологияси асосида интенсив боғлар барпо қилинади. Айни дамларда ташаббускорлар томонидан зарур технологиялар келтирилиб, улаш, мужассамлаштириш ишлари амалга оширилаётир.

Худди шунингдек, қисқартирилган майдонларнинг 1700 гектари “Kosonsoy agro group

klaster” МЧЖ тасарруфига берилиши эвазига косонсойлик минглаб ёшларга алоҳида ер майдонлари бириктириб берилади. Уларга янги иш ўринлари, эркин меҳнат қилиш, мўмай даромад олиш, янада фаровон ҳаёт кечириш имкониятлари яратилади.  Кластер томонидан уруғ ва моддий ресурслар таъминоти тўлиқ йўлга қўйилади.

Косонсой мамлакатимиздаги энг сув таъминоти оғир бўлган туманлар сирасига киради. Шу давргача асосий ҳудудларга минг бир машаққатлар эвазига насослар ёрдамида сув чиқариб берилди. Биргина ғалла етиштириш учун гектарига 3,5-4 минг метр куб сув сарфланиб, ортиқча харажат қилинишига тўғри келаётганди. Мамлакатимизда узоқни кўзлаб амалга оширилаётган ислоҳотлари сабаб туманимиз қишлоқ хўжалигида ҳам туб бурилиш ясаш имкониятлари яратилди. Наманган вилоятида озиқ-овқат маҳсулотларини кўпайтириш, аҳоли бандлигини таъминлаш, мавжуд ер майдонларидан самарали фойдаланиш, ҳар бир ҳудудда сабзавот, картошка, дуккакли ва мойли экинларни яхлит майдонларга жойлаштириш ҳамда плантация усулида интенсив ва мевали боғ ҳамда токзорлар барпо этиш орқали маҳсулот етиштириш, қайта ишлаш ҳамда экспорт ҳажмини оширишдек улуғ мақсадни кўзлаб қабул қилинган Президентимизнинг қарори косонсойликларга янгидан-янги умидбахш орзу ва режаларини амалга ошириш йўлларини очиб берди. Агар қарор ижроси ўз муддатида, ҳамжиҳатликда амалга оширилса, туманда 40-50 фоиз миқдоридаги обиҳаёт тежалади.

 

Баҳодир  ЮСУПОВ,

Косонсой тумани ҳокими

 
© 2014-2021, Namangan viloyat Kosonsoy tuman hokimligining rasmiy axborot portali. Sayt materiallaridan foydalanilganda www.kosonsoy.uz manbasi ko'rsatilishi shart.
Sayt Namangan viloyati hokimligining Kompyuterlashtirish markazi tomonidan ishlab chiqilgan.