КОСОНСОЙДАГИ 9-ДИМИ ОТМГА КИРИШДА 100 ФОИЗЛИК НАТИЖА ҚАЙД ЭТИШДИ

02.10.2020

Жамият тараққиёти, миллий фаровонлик ҳамиша ёш авлоднинг таълим-тарбияси, замонавий билимларни чуқур эгаллаган янги кадрлар, уларнинг юксак малакаси билан боғлиқ бўлиб келган. Мамлакатимизда янги замон авлодини тарбиялаш, улар дунёқарашини янгича қадриятлар асосида шакллантириш давлат сиёсати даражасига кўтарилган бўлиб, уларнинг мукаммал билим олиб, илм-маърифат йўлидан шаҳд билан боришларига барча имкониятлар яратиб берилмоқда. Шунинг натижасида келажак сари шаҳд билан одимлаётган Наманган вилояти шаҳар ва туманларидаги битирувчи ёшлари қувончли марралар, муваффақият манзилларини забт этишда давом этмоқдалар. Жорий ўқув йилида Косонсой туманидаги  9-сонли давлат ихтисослаштирилган мактаб-интернатини  19 нафар битирувчи тамомлади.  Қувонарлиси, уларнинг 16 нафари юртимиздаги давлат олий таълим муассасаларига, шунингдек, 3 нафари  хорижий давлатлардаги олий ўқув юртлари талабалари сафига қабул қилиниб, 100 фоизлик натижага эришдилар.

-  Бу муваффақият бутун педагогик жамоа, ота-оналар ва иқтидорли ўқувчиларники.  34 нафар мактаб жамоасидаги устоз-муаллимлар, айниқса, битирувчи синф раҳбари, математика фани ўқитувчиси Фахриддин Соаталиев шижоати алоҳида эътирофга лойиқ.

- Бундай муваффақият бизга иштиёқ, айни пайтда янада улкан масъулият бағишлаш баробарида, янада изланиш, тинимсиз меҳнат қилишга ундайди, - дейди илм маскани директори Маъмура Султонова.

Барча битирувчиларга  истиқболда янада нурафшон  чўққиларни забт этишда зафарлар тилаймиз.

 

Наманган вилоят халқ таълими бошқармаси Ахборот хизмати

КОСОНСОЙ ТУМАН ҲОКИМИ БАҲОДИР ЮСУПОВНИНГ ЎҚИТУВЧИ ВА МУРАББИЙЛАРГА БАЙРАМ ТАБРИГИ

01.10.2020

Ассалому алайкум, муҳтарам устозлар!

 

Аввало, Сиз, азизларни, сизларнинг тимсолингизда устоз деган шарафли номни улуғлаб келаётган туманимиздаги барча инсонларни Ўқитувчи ва мураббийлар куни билан самимий табриклайман.

 

Бугун ушбу айёмни нишонлар эканмиз, биринчи навбатда қадрдон мактабимиз, бизга ҳарф ўргатган, эзгуликдан сабоқ берган меҳрибон муаллимларимиз сиймоси кўз олдимизда гавдаланади. Биз учун ибрат намунаси, юксак инсоний фазилатлар тимсоли бўлган азиз ва мўътабар зотлар шаънига энг гўзал сўзлар, эзгу тилакларимизни изҳор этамиз. Ҳеч қачон узиб бўлмайдиган қарздорлик ҳисси билан таъзим қиламиз.

 

Сўнги хушхабар сифатида, кечагина Муҳтарам Президентимиз томонидан туманимиздаги 35-мактабнинг математика фани ўқитувчиси Исмоилжон Бегматов “Содиқ хизматлари учун” медали билан тақдирлангани барчамизни бирдек хурсанд этди.

 

Азиз дўстлар, фахрий устозлар!

 

Биз бугун замонавий билим ва касб-ҳунар, хорижий тилларни пухта эгаллаб, катта умид ва ишонч билан ҳаётга қадам қўяётган, эртанги кунимизнинг ҳал қилувчи кучи бўлган минг-минглаб фарзандларимиз камолида ўқитувчи ва мураббийларимизнинг беқиёс ҳиссаси борлигини яхши биламиз ва сизларнинг бу улуғ хизматингизни юксак қадрлаймиз.

Зеро, миллатнинг, халқнинг эртаси, тараққиёти азиз устозлар қўлида!

 

Муҳтарам ўқитувчи-мураббийлар, азиз устозлар!

 

Агарда дунёда иморатлар ичида энг улуғи мактаб бўлса, касблар ичида энг шарафлиси ўқитувчилик ва мураббийликдир!

 

Сизларни 1 октябрь – ўқитувчи ва мураббийлар куни билан яна бир бор табриклаб, барчангизга узоқ умр, бахт-саодат, хонадонингизга файзу-барака, баркамол авлодни вояга етказишдаги эзгу ишларингизга улкан зафарлар тилайман!

УСТОЗ ВА МУРАББИЙЛАР МУНОСИБ ТАҚДИРЛАНДИ

30.09.2020

Халқимизда “Устоз – отангдек улуғ”, деган нақл бор. Ҳақиқатдан ҳам, қўлимизга қалам олиб, ўқишни, ёзишни ўргатган, оқ-қорани, яхши ёмонни танитган, илм-маърифат ила қалбимизга зиё олиб кирган устозларимизни қанча мақтасак, эътироф этсак шунча кам.

1-октябр – Устоз ва мураббийлар куни. Бу улуғ кунда барча ўқитувчилар, устоз ва мураббийлар ўз шарафли касбларини нишонлайдилар.

Бугун Юртбошимиз Шавкат Мирзиёев томонидан халқаро конгресс марказида ўқитувчи ва мураббийлар кунига бағишланган тантанали маросим бўлиб ўтди. Унда давлатимиз раҳбари барча устоз ва мураббийларни байрам билан табриклади.

Ушбу маросим якунлангандан сўнг, Косонсой тумани ҳокимлиги биносида тадбир ташкил қилинди. Унда туман ҳокими Баҳодир Юсупов иштирок этиб, устоз ва мураббийларни машаққатли касби йўлидаги фаолияти, изланишлари яна бир бор эътироф этиб, келгусидаги ишларига улкан зафарлар тилаб, “Ташаккурнома” ва эсдалик совғалари тақдирлади.

БЕГМАТОВ ИСМОИЛЖОН - ПРЕЗИДЕНТ ТОМОНИДАН ДАВЛАТ МУКОФОТИ БИЛАН ТАҚДИРЛАНДИ

30.09.2020

Бугун - 30 сентябрь куни Ўзбекистон Республикаси Президенти Шавкат Мирзиёев “Ўқитувчи ва мураббийлар куни муносабати билан таълим-тарбия тизимида алоҳида ўрнак кўрсатган ходимлардан бир гуруҳини мукофотлаш тўғрисида”ги фармонини имзолади.

Қувонарлиси шундаки, мукофотланганлар қаторида Косонсой туманидаги 35-умумий ўрта таълим мактабининг математика фани ўқитувчиси Бегматов Исмоилжон Абдуллаевич "Содиқ хизматлари учун" медали билан тақдирланди.

Ёш авлод таълим-тарбияси ва камоли йўлида фидойилик билан хизмат қилаётган, халқ таълими ҳамда мактабгача таълим соҳалари ривожига салмоқли ҳисса қўшаётган жонкуяр муаллимимизни юксак мукофот билан чин қалбдан табриклаймиз!

 

 

ТИЛ ҲАР БИР МИЛЛАТНИНГ АСОСИ

23.09.2020

Бу - миллий ғурур, она тилимизнинг тақдири, уни асраш, келажак авлодларга етиб бориш имкониятини яратиш билан боғлиқ. Қолаверса, ўз миллий тилига ҳурмат мамлакатимизнинг дунёда муносиб эътирофга эга бўлишида ҳам муҳим омил сифатида қаралади. Чунки, бугунги глобаллашув даврида ўзлигини англаган ҳар бир халқ миллати ва миллий қадриятларини асраб қолиш устида тинимсиз бош қотирмоқда. Техниканинг шиддатли ривожи, сиёсий-иқтисодий жараёнлар суръати ва маданиятлараро мулоқот кучайиб бораётган ҳозирги даврда замон билан ҳамнафас юришга, ўзининг тили, маданиятига бу жараёнларнинг “емириш” ва “йўқ қилиш” даражасидаги салбий таъсирини имкон қадар камайтиришга ҳаракат қилмоқда. Мазкур жараёндан биз ҳам четда қолаётганимиз йўқ, албатта.

Бу йил “Давлат тили тўғрисида”ги қонун қабул қилинганига 30 йил тўлади. Шу вақт ичида тилимизнинг ривожланиш ҳолати ва ундан фойдаланиш бўйича қанчадан-қанча жараёнларни бошдан кечирдик. Бу давр ҳам бир тарихга айланди. 

Бугунги кунда мамлакатимиз шиддат билан ривожланаётгани, халқимиз турмуш фаровонлиги яхшиланиб, халқаро майдонда нуфузи ортиб бораётганини ҳеч ким инкор эта олмайди. Биз ҳозиргача йўл қўйилган камчиликларни муҳокама қилиб, бир-биримиздан ёзғириш эмас, нима қилишимиз кераклиги ҳақида қайғуришимиз, аниқ чоралар кўришимиз керак.

Она тилимиз, ўзбек тили, давлат тили масалаларида энди эҳтиросларга берилиш даври ўтди. Давлат тили мақомини мустаҳкамлашга ҳаракатни ҳар биримиз ўзимиздан, ўз фаолиятимиздан бошлашимиз керак. Миллатнинг борлиги ва борлиғини кўрсатувчи тилимизни асраб-авайлаш, оила, жамоа, маҳалладан бошланади. 

Мактабда русийзабон синфда таълим олган ёшлар олий таълим муассасаси талабаси бўлганида ҳам ўзбек тилини ўрганишга қийналади. Уларнинг аксарияти умумий ўрта таълим ва ўрта махсус касб-ҳунар тизимида ўқитиладиган дастурларни ўзлаштирмаган ҳолда келади. Бунинг сабаби дарсларнинг самарадорлик даражаси етарли эмаслигида. Масаланинг яна бир томони бор. Олий таълим муассасаларида ўзбек тили дарси ўтиладиган 1-курс русийзабон талабалари ўз соҳаси, таълим йўналиши бўйича ўзбек тилига оид махсус атамаларни, соҳага оид тилни ўрганиш ўрнига, афсуски, яна ўша грамматика қоидалари ва асосий мулоқот мавзулари бўйича суҳбатлашишга ўргатиш давом этади, холос. Тил таълими узвийлиги ва узлуксизлигининг таъминланмаётганидан далолат бу.

Биз кутган натижага эриша олмаётганимизнинг яна бир сабаби турли замонавий дарсликлар, луғатлар, сўзлашгичлар етишмаслигида. Мамлакатимизда яшовчи ҳар қандай миллат вакили қизиқиши ва ўзлаштиришига қулай бўлган турли шакл ва услубдаги ўқув адабиётлари билан таъминланиши зарур. Нафақат фуқароларимиз, балки ҳозирда ўзбек тилини ўрганишга қизиқиш билдираётган хорижликлар учун ҳам қулай, ижобий натижага қаратилган тил ўргатувчи китоблар етарли эмаслиги ачинарли ҳол. Лотин ёзуви асосидаги онлайн дарсликлар, электрон луғатлар, қизиқарли китобларнинг кўплаб муқобил вариантларини яратиш керакки, ўрганувчида танлаш имконияти бўлсин.

Ўзбек тилини таълимнинг энг қуйи босқичларидан ўргатиб бориш бўйича замонавий методика ишлаб чиқиш зарур. Агар ўқитувчи синфда ёки аудиторияда ёшларда ўзбек тилини ўрганишга қизиқиш ва эҳтиёж уйғотиб, унда тилга ҳурмат туйғусини уйғота олмас экан, давлат тилининг жамиятдаги мавқеини кўтариш мушкул иш. Бу борада масофавий таълим, мустақил ўрганишга йўналтирилган видеодарсларни ҳам кўпайтириш ва интернет тармоқларига жойлаштириш мақсадга мувофиқ.

Турли соҳаларга оид махсус фанлар бўйича ўзбек тилидаги ўқув адабиётларининг етарли эмаслиги, махсус терминология, айниқса, янги атама ва терминларнинг мунтазам киритиб борилмаётгани мутахассис тайёрлашда ҳам муаммолар келтириб чиқаради. Шунинг учун ҳам олий таълимни битириб, соҳаси бўйича ишга кирган ёш кадрларга амалиётдан узилган, энг яхши ҳолатда назарий билим билан чекланган кадр, ёмон ҳолатда соҳаси бўйича етарли, замонавий билим ва малакага эга бўлмаган кадр сифатида қаралмоқда. 

Халқимиз, айниқса, ёшлар маънавиятини юксалтиришда тилнинг аҳамияти ниҳоятда катта. Бироқ охирги пайтларда намойиш этилаётган фильмларда бошқа миллат сўзлари, турли тушунарсиз ёки қўпол, маънавиятимиз ва қадриятларимизга зид бўлган сўзлар ишлатилиши учрамоқда. Бундай ҳолатларни баъзи санъаткорларнинг қўшиқларида ҳам учратиш мумкин. Бу борада ҳам мутахассисларнинг назоратига эҳтиёж бор.

Жамоат жойларида, кўчаларда, турли лавҳаларда, бинолар пештоқида аҳоли диққатини жалб этадиган жойларда номлар ёки рекламаларнинг ҳеч бир маъни ва қолипга тўғри келмайдиган шаклу шамойилда берилаётгани умумий саводхонлик даражаси тушиб кетганидан, мутахассис бўлган зиёлиларнинг эса бефарқ ва лоқайдлигини кўрсатиб турибди, афсус. Бу борада ҳам Ўзбекистон Республикасининг “Реклама тўғрисида”ги, “Фирмаларнинг номлари тўғрисида”ги каби тил билан боғлиқ қонунларини такомиллаштириш ва қонун бузилиш ҳолатларида чора кўришни белгилаш зарур. Шунда тил ва ёзув ўртасидаги чалкашликлар, маънавиятимизга ёт ифодаларнинг оммалашиши олди олинади. Хатоликларга йўл қўяётган, лекин бунга жиддий қарамаётган шахслар ҳам шу ёзувлар ўзининг саводсизлиги намойиши эканини тушуниб етар. Натижада миллийлигимиз тимсоли бўлган тилимизга беписандлик, ҳурматсизлик билан қарашга барҳам берилар, деб ўйлайман.

Ўзбек тилшунослигида ҳамма тан оладиган мукаммал илмий асарлар яратиш, грамматика, орфография, фонетика, айниқса, стилистика бўйича тўлиқ маълумотлар асосидаги амалиёт билан боғланган китобларни кўплаб нусхаларда, етарли ададда нашр этиш зарур. Бундай китобларга эҳтиёж ниҳоятда катта. Буларни таъминламасдан туриб, нафақат бошқа тил эгаларининг ўзбек тилини чуқур билишига эришиш, балки умумий саводхонликни оширишга эришиб бўлмайди. 

Юқоридаги масалаларни ҳал этиш, ўзбек тилининг ўзимиз хоҳлагандек нуфузга эга бўлиши учун барчамиз бирдек ҳаракат қилишимиз, лоқайд бўлмаслигимиз керак, зеро, ҳаётда бўш турган жойни бошқа биров эгаллашга ҳаракат қилади.

Ўзбек тилининг халқаро нуфузи тобора юксалаётган, АҚШ, Германия, Хитой, Япония, Жанубий Корея, Россия ва Украина каби давлатларнинг олий таълим муассасаларида ўзбек тили йўналиши очилиб, ўша мамлакатлар ёшлари она тилимизни ўрганишга катта қизиқиш билдириб, ўзбек тили ва адабиёти, қиёсий мавзулар бўйича илмий изланиш олиб борувчи чет эллик тадқиқотчилар сони йил сайин кўпаяётган бир пайтда ўзимиз борлигимиз ва борлиғимиз тимсоли бўлган тилимизга эътиборли бўлайлик.

 

Замира НИШОНОВА,

Туман ҳокимининг маънавий-маърифий ишлар самарадорлигини ошириш, давлат тили тўғрисидаги қонун хужжатларига риоя этилишини таъминлаш масалалари бўйича маслаҳатчиси

1-БАҲОРИСТОН САЙЛОВ ОКРУГИ БЎЙИЧА БЎШАБ ҚОЛГАН ЎРИНГА ХАЛҚ ДЕПУТАТЛАРИ КОСОНСОЙ ТУМАН КЕНГАШИ ДЕПУТАТЛИГИГА САЙЛОВ ЎТКАЗУВЧИ САЙЛОВ ОКРУГИНИ ТУЗИШ ТЎҒРИСИДА

23.09.2020

 

Ўзбекистон Республикасининг Сайлов кодекси 9 ва 20, 93-моддалари, шунингдек, халқ депутатлари Косонсой туман Кенгаши қарорига мувофиқ, халқ депутатлари Косонсой туман Кенгашига сайлов ўтказувчи туман сайлов комиссияси

 

Қ А Р О Р   Қ И Л А Д И:

 

1. Бўшаб қолган ўринга Халқ депутатлари Косонсой туман Кенгаши депутатлигига сайлов ўтказувчи 1-Баҳористон сайлов округи қуйидаги тартибда тузилсин:

 

Маркази: Косонсой тумани, Олмазор  маҳалласи, Олмазор кўчаси 7 уй, 44-сонли мактаб биноси.

Косонсой туманининг: Баҳористон, «Олмазор» маҳалла фуқаролар йиғинлари ҳудудлари чегараларида. Сайловчилар сони 5150 та.

2. Мазкур қарор маҳаллий оммавий ахборот воситаларда эълон қилинсин.

3. Мазкур қарор ижросини таъминлаш туман сайлов комиссияси раиси ўринбосари И.Муродов зиммасига юклансин.

 

 

Халқ депутатлари Косонсой туман

Кенгашига сайлов ўтказувчи туман

сайлов комиссияси раиси:                                                          Қ.Иномов 

МИБ НАМАНГАН ВИЛОЯТ БОШҚАРМАСИ: СОБИҚ ИНСПЕКТОРЛАРНИ ИШГА ЖОЙЛАШТИРИШ ИШЛАРИ ДАВОМ ЭТМОҚДА !

19.09.2020

Жорий йилнинг 19 сентябрь куни ижтимоий тармоқларда “7 июлдан бўшадик, аммо ваъда қилинган ишдан дарак йўқ” сарлавҳа остида хабар жойлаштирилган.

Мурожаатда Мажбурий ижро бюросининг Косонсой туман бўлимининг собиқ давлат инспекторлари ханузгача газ ва электр таъминоти корхонасига ишга жойлашмагани, қонунан белгиланган мукофот пули ва ишдан бўшатиш нафақаси ҳам берилмаганини баён этишган.

Мазкур мурожаатда кўтарилган масалалар ўрганилганида қуйидагилар маълум бўлди.

Маълумки, Ўзбекистон Республикаси Президентининг 18.06.2020 йилдаги ПФ-6010-сонли Фармонига асосан, Бюронинг Косонсой туман бўлимининг энергия ресурслари ва маиший чиқиндилар бўйича қарздорликни ундириш ва назорат қилишга масъул бўлган 34 нафар ходимларга жорий йилнинг 19 июнь куни расман ёзма равишда огоҳлантириш хатлари берилган.

Шунингдек, Фармоннинг 4-банди бешинчи хатбошисида белгиланган талабларга асосан Бюронинг Косонсой туман бўлимининг шўъба инспекторлари ҳамда давлат инспекторларини иш билан таъминлаш мақсадида, таъминотчи корхоналар иштирокида жорий йилнинг 22 июнь, 3 июль ва 9 сентябрь кунлари бўлим биносида собиқ давлат инспекторлари билан  мулоқот қилиниб, таъминотчи корхоналар томонидан бўш иш ўринлари таклиф этилган.

Бундан ташқари, 2020 йил 18 сентябрь куни бошқарма бошлиғининг биринчи ўринбосари иштирокида собиқ давлат инспекторлари билан йиғилиш ўтказилиб, ходимларнинг муаммолари эшитилди. Йиғилиш давомида ўртага ташланган муаммолар жойида бартараф этилди.

Шуни маълум қиламизки, 19 сентябрь кунига қадар собиқ ходимларнинг 21 нафари ишга жойланган. 13 нафари эса таклиф этилган иш ўринларини рад этишган.

Шунингдек, меҳнат қонунчилигига асосан Бюронинг Косонсой туман бўлимининг 23 нафар давлат инспекторларига иш ҳақи ва унга тенглаштирилган тўловлар тўлиқ қайта ҳисоб-китоб қилиниши таъминланди.

Мажбурий ижро бюросининг марказий аппарати масъул ходимлари, шунингдек, Бюронинг Наманган вилоят бошқармаси бу каби масалалар қолаверса, меҳнат қонунчилигига амал қилиниши, иш ҳақи ва  бошқа тўловларнинг тўланиши масалалар бўйича  - Мажбурий ижро бюросининг марказий аппарати масъул ходимлари мурожаатларни қабул қилиш ҳамда тушунтириш беришга тайёр эканини билдириб қолади.

Мурожаат учун телефон рақамлари:

(71-207-11-72, 71-207-11-98, 69-228-82-83)

                                              

Мажбурий ижро бюроси

Наманган вилоят бошқармаси

 
© 2014-2020, Namangan viloyat Kosonsoy tuman hokimligining rasmiy axborot portali. Sayt materiallaridan foydalanilganda www.kosonsoy.uz manbasi ko'rsatilishi shart.
Sayt Namangan viloyati hokimligining Kompyuterlashtirish markazi tomonidan ishlab chiqilgan.