ХАЛҚ ДЕПУТАТЛАРИ КОСОНСОЙ ТУМАН КЕНГАШИ БЎШАБ ҚОЛГАН ЎРИНГА ДЕПУТАТЛИК САЙЛОВИНИНГ ТАКРОРИЙ ОВОЗ БЕРИШИНИ ЎТКАЗИШ ТЎҒРИСИДА

17.10.2020

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

ХАЛҚ ДЕПУТАТЛАРИ КОСОНСОЙ ТУМАН КЕНГАШИГА САЙЛОВ ЎТКАЗУВЧИ

ТУМАН САЙЛОВ КОМИССИЯСИНИНГ

Қ А Р О Р И

 

 

№ 11 -сон                                                                 2020 йил “13” октябр

 

ХАЛҚ ДЕПУТАТЛАРИ КОСОНСОЙ ТУМАН КЕНГАШИ БЎШАБ ҚОЛГАН ЎРИНГА

ДЕПУТАТЛИК САЙЛОВИНИНГ ТАКРОРИЙ ОВОЗ БЕРИШИНИЎТКАЗИШ

ТЎҒРИСИДА

 

Ўзбекистон Республикаси Сайлов кодексининг 59 - моддасига

асосан туман сайлов комиссияси

Қ А Р О Р   Қ И Л А Д И:

1.  Ўзбекистон Республикаси Сайлов кодексининг 59,93 - моддаларига асосан

Халқ депутатлари Косонсой туман Кенгаши бўшаб қолган ўринга ўтказилган

депутатлик сайловлар бўйича округ сайлов комиссиялари тақдим этган

баённомаларига биноан сайловда қатнашган 5 нафар депутатликка

сиёсий партиялардан кўрсатилган номзодлардан энг юқори овоз тўплаган

қуйидаги номзодлар (2 нафар) такрорий овоз беришга қўйилсин:

Сайлов округининг номи

Ф.И.Ш, туғилган йили ва жойи, миллати

Иш жойи, лавозими,

 

Сиёсий партия номи

1-Баҳористон

Шеров Шерзод Абдурахимович,

1978 йилда туғилган, Баҳористон МФЙ да яшайди, тожик

“AS Group Tex” МЧЖ шаклидаги Қўшма корхонаси директори

ЎзЛиДеП Кенгаши

Ҳамдамов Илҳомжон Исломжонович,

1984 йилда туғилган, М.Аъзам МФЙ да яшайди, тожик

Ўз. МТДП аъзоси, “Илҳом” хусусий корхонаси раҳбари

Ўзбекистон МТДП

 

2.  Ўзбекистон Республикаси Сайлов кодексининг 59,93 - моддасига асосан

Халқ депутатлари Косонсой туман Кенгаши бўшаб қолган ўрин

депутатлига такрорий овоз бериш 2020 йилнинг 25 октябр -

якшанба кунига белгилансин.

3. Такрорий овоз бериш округ кесимида тасдиқланган сайлов

участкаларида ўтказилиши белгилансин.

4.  Округ ва участкалар таркиби қайта кўриб чиқилсин ва тегишли

ўзгартиришлар киритилган ҳолда тасдиқлансин.

5. Такрорий овоз беришда овоз беришда қатнашган сайловчиларнинг энг кўп овозини

олган номзоднинг депутатликка сайланганлиги эътироф этилиши кўрсатиб ўтилсин. 

6. Қарор ижроси назорати туман сайлов комиссияси раиси

ўринбосари И.Муродовга юклатилсин.

 

Халқ депутатлари Косонсой туман

Кенгашига сайлов ўтказувчи туман

сайлов комиссияси раиси:                                                      Қ.Иномов 

ХАЛҚ ДЕПУТАТЛАРИ КОСОНСОЙ ТУМАН КЕНГАШИНИНГ БЎШАБ ҚОЛГАН ЎРИНГА ЎТКАЗИЛГАН САЙЛОВЛАР НАТИЖАЛАРИ ТЎҒРИСИДА

17.10.2020

Халқ депутатлари Косонсой  туман Кенгашининг бўшаб қолган 1-Баҳористон сайлов округида 2020 йил 11 октябр куни бўлиб ўтган сайловлар натижаларига кўра, округ сайлов комиссиясининг сайлов натижаларини аниқлаш тўғрисидаги баённомаларига асосан, ҳамда Ўзбекистон Республикаси Сайлов кодексининг 20, 59, 93,96, 97 моддаларига мувофиқ туман сайлов комиссияси

Қ А Р О Р   Қ И Л А Д И:

  1. 2020 йил 11 октябр куни Халқ депутатлари Косонсой туман Кенгашининг бўшаб қолган ўринга депутатлик сайлови бўйича ўтказилган овоз бериш натижаларига кўра  сайлов округидан номзодлари кўрсатилган депутатларнинг олган овозлари натижалари иловага мувофиқ эътироф этилсин.
  2. Сайловлар натижаларига кўра сиёсий партиялардан кўрсатилган номзодларнинг хеч бири етарли 50% лик натижага эришмаганлиги сабабли округ бўйича такрорий овоз бериш ўтказилиши белгилансин.
  3. Такрорий овоз беришда энг юқори овоз олган 2 нафар номзоднинг иштирок этишига рухсат берилсин.

2.Ушбу қарор матбуотда эълон қилинсин.

 

Халқ депутатлари Косонсой туман

Кенгашига сайлов ўтказувчи туман

сайлов комиссияси раиси:                                                                 Қ.Иномов

ХАЛҚ ДЕПУТАТЛАРИ КОСОНСОЙ ТУМАН КЕНГАШИНИНГ 16-СЕССИЯСИ БЎЛИБ ЎТДИ

16.10.2020

Бугун Халқ депутатлари Косонсой туман Кенгашининг навбатдаги ўн олтинчи сессияси бўлиб ўтди.

 

Сессия ишида туман Кенгаши депутатлари, секторлар раҳбарлари ўринбосарлари, туман ҳокими ўринбосарлари ҳамда оммавий ахборот воситалари вакиллари қанашди.

 

Дастлаб сессия кун тартибидаги биринчи масала туманда камбағалликни қисқартириш ва эҳтиёжманд оилаларни “Темир дафтар”дан чиқариш бўйича амалга оширилаётган ишлар тўғрисида секторлар раҳбарларининг ҳисоботлари тингланди.

 

Шундан сўнг навбатдаги масала - Ўзбекистон Республикаси Президентининг Косонсой туман Халқ қабулхонаси мудири Т.Муйдинованинг секторлар ҳамда ҳудуддаги ташкилотлар раҳбарлари томонидан 3-чорак давомида мурожаатлар билан ишлаш ҳолати юзасидан киритилган ахборот тўғрисида ҳисобот берди.

 

Сессияда кун тартибидаги масалалар юзасидан Халқ депутатлари туман Кенгашининг тегишли қарорлари қабул қилинди.

 

Туман ҳокимлиги ахборот хизмати

КОСОНСОЙ ТУМАН ҲОКИМИГА ЎРИНБОСАР ТАЙИНЛАНДИ

14.10.2020

Косонсой туман ҳокимининг 2020 йил 12 октябрь кунги қарори билан Салимжонов Бахтиёржон Рахимжонович - Косонсой тумани ҳокимининг ўринбосари - инвестициялар ва ташқи савдо бўлими бошлиғи этиб тайинланди.

 

Салимжонов Бахтиёржон 1978 йилда Косонсой туманида туғилган.

 

1998-2006 йиллар Акциядорлик тижорат «Тадбиркорбанк» Косонсой бўлимида турли лавозимларда фаолият юритган;

 

2006-2008 йилларда «Микрокредитбанк» акциядорлик тижорат Косонсой мини банки бошлиғи;

2008-2011 йилларда «Микрокредитбанк» акциядорлик тижорат банки Наманган вилояти Косонсой филиали бошқарувчиси;

 

2011-2019 йилларда Косонсой тумани ҳокимининг иқтисодиёт ва ижтимоий ривожлантириш масалалари бўйича ўринбосари вазифасини бажарувчиси, туман ҳокимлигининг иқтисодиёт бўлими бошлиғи, туман ҳокимлигининг ҳудудларни комплекс ривожлантириш йиғма бўлими бошлиғи, туман ҳокимининг иқтисодиёт ва тадбиркорлик масалалари бўйича биринчи ўринбосари;

 

2019 йилдан ҳозирги вақтгача “Жавони Моҳир” масъулияти чекланган жамияти раҳбари лавозимида фаолият кўрсатиб келган.

 

Косонсой туман ҳокимлиги ахборот хизмати

КОСОНСОЙ ТУМАН ҲОКИМИНИНГ 1064-СОНЛИ ҚАРОРИ

13.10.2020

Косонсой туманидаги умумий ўрта таълим мактабларига мактаб ёшидаги болаларни тўлиқ қамраб олиш мақсадида мактаблар  микроҳудудини белгилаш тўғрисида

 

         Ўзбекистон Республикаси Вазирлар Маҳкамасининг 2017 йил                  15 мартдаги “Умумий ўрта таълим тўғрисидаги Низомни тасдиқлаш тўғрисида”ги 140-сонли ҳамда 2019 йил 7 июндаги “Болаларни давлат умумий ўрта таълим муассасаларига қабул қилиш бўйича давлат хизматлари кўрсатишнинг маъмурий регламентини тасдиқлаш тўғрисида”ги 469-сонли қарорларининг ижросини таъминлаш, тумандаги барча умумий ўрта таълим мактабларига мактаб ёшидаги болаларни тўлиқ қамраб олиш жараёнида умумтаълим муассасаларига бириктирилган ҳудудлар (микроҳудуд)ни аниқ белгилаб олиш мақсадида, Ўзбекистон Республикаси “Маҳаллий давлат ҳокимияти тўғрисида”ги Қонуннинг 6 ва 25-моддаларига асосан,

 

Қ А Р О Р   Қ И Л А М А Н:

 

1. Косонсой туманида мактаб ёшидаги болаларни умумий ўрта таълимга тўлиқ қамраб олиш бўйича умумтаълим муассасаларига бириктирилган ҳудудлар (микроҳудуд) рўйхати иловага асосан тасдиқлансин.

2. Туман ҳокимининг ўринбосари (А.Шералиев), туман халқ таълими бўлими (М.Аллохонова), тумандаги умумий ўрта таълим муассасалари раҳбарлари мактаб ёшидаги болаларни умумий ўрта таълимга тўлиқ қамраб олиш, ўқувчиларнинг дарсларга қатнашиш ҳолати юзасидан мониторинг олиб бориш ва унинг натижасида аниқланган муаммоларни бартараф этиш бўйича зарур чоралар кўриш вазифаси топширилсин.

3. Белгилансинки, тумандаги умумтаълим муассасалари раҳбарлари ўзлари раҳбарлик қилаётган муассасага бириктирилган ҳудуддаги мактаб ёшидаги болаларни ўз вақтида умумий ўрта таълим муассасасига ўқишга жалб қилиш учун масъул ҳисобланади.

4. Туман ҳокимининг ўринбосари, Маҳалла ва оилани қўллаб-қувватлаш бўлими бошлиғи (М.Сойиббоев), маҳалла фуқаролар йиғини раислари мактаб ёшидаги болаларни умумий ўрта таълим муассасаларига жалб этиш жараёнида туман халқ таълими бўлими ҳамда умумий ўрта таълим муассасаларига амалий ёрдам бериш тавсия этилсин.

5. Мазкур қарор “Косонсойнома” газетасида расмий эълон қилинсин ва ҳокимликнинг расмий веб-сайтига жойлаштирилсин.

6. Мазкур қарор расмий эълон қилинган кундан эътиборан кучга киради.

7. Мазкур қарор ижросини назорат қилиш туман ҳокимининг ўринбосари А.Шералиев зиммасига юклатилсин.

 

 

 

Туман ҳокими                                        Б. Юсупов

ТИЛ - МИЛЛАТ КЎЗГУСИ

13.10.2020

Тил буюк неъмат.  Улуғ маърифатпарвар бобомиз Абдулла Авлоний таъкидлаганидек, ҳар бир миллатнинг дунёда борлигини кўрсатадиган ойинаи ҳаёти – бу унинг миллий тили ва адабиётидир. ". Дарҳақиқат,  ҳар бир миллат ўз тилини эъзозласа, қадрласа, тараққиёти учун жон куйдирса, у тил гўзал, бетакрор ва буюк бўлиб қолаверади! Ҳар бир халқ азиз ва муқаддас бўлган ўз тилини асраб-авайлаш,  ривожлантириш, жозибасини тўла намоён этиш учун ҳаракат қилади, чунки унда ҳар бир  халқнинг тарихи, миллий қадриятлари, маданияти ўша халқнинг она тилиси орқали ифодаланади.

 

1989 йил 21 октябрда ўзбек тилига Давлат тили мақомининг берилиши ҳам халқимиз ҳаётида шубҳасиз буюк тарихий воқеа ва Ўзбекистоннинг мустақиллик сари қўйган илк тамал тоши бўлди.  Давлатимиз мустақиллиги  эълон қилиниши билан она тилимиз ўзининг ҳақиқий ўрни ва мавқеига эга бўлди.

 

Ўтган давр мобайнида дунёдаги қадимий ва бой тиллардан бири бўлган она тилимизга миллий меросимизнинг асосларидан бири сифатида катта эътибор қаратилган ҳолда унинг мавқеини ошириш, софлигини сақлаш, бу борадаги қонунчилигимизнинг маъно-мазмунини ёш авлод онгига сингдириш йўлида улкан ишлар амалга оширилди.

 

Ўзбек тилининг халқимиз ижтимоий ҳаётида ва халқаро миқёсдаги обрў-эътиборини тубдан ошириш, ўсиб келаётган ёш авлодни ватанпарварлик, миллий анъана ва қадриятларга садоқат руҳида тарбиялаш, мамлакатимизда давлат тилини тўлақонли жорий этишни таъминлаш мақсадида ўзбек тилига давлат тили мақоми берилганлиги бежиз эмаслигини истиқлоллимизнинг ўтган даври исботлаб берди.

 

Шунингдек,  Вазирлар Маҳкамаси тузилмасида Давлат тилини ривожлантириш департаменти ташкил этилганлиги,  ҳукумат қарори билан давлат ва хўжалик бошқаруви органлари, муассаса ҳамда бошқа ташкилотларда давлат тили тўғрисидаги қонун ҳужжатларига риоя этилиши, ўзбек тилини ривожлантиришни таъминлаш масалалари бўйича маслаҳатчиси (масъул ходим) лавозими жорий этилганлиги ҳам "Давлат тилига" бўлган эътибор намунасидир.

 

“Давлат тили ҳақида”ги Қонуннинг тарихий ўрни ва аҳамиятини инобатга олган ҳолда давлат тилини ривожлантиришга қаратилган ишларнинг узвий давоми сифатида 2020 йил 10 апрель куни Президентимиз томонидан Ўзбекистон Республикасининг “Ўзбек тили байрами кунини белгилаш тўғрисида”ги Қонуни имзоланди. Унга мувофиқ 21 октябрь санаси юртимизда “Ўзбек тили байрами куни” деб белгиланди. Бу билан давлат рамзларидан бири саналган маънавий қадриятимиз – она тилимиз қонун ҳимоясида эканлиги яна бир бор ўз исботини топди.

 

Ушбу байрамнинг мамлакатимизда кенг нишонланиши она тилимизга эътиборни юксалтириш, унинг мукаммаллиги ва бойлигини кўрсатиб бера олиш, нафақат ўзбек халқи, балки бошқа миллат вакилларини ҳам бебаҳо бойлигимиз ҳисобланган тилимиз ва маданиятимизни ўрганишга илҳомлантиришда хизмат қилади.

 

Бу эса ушбу юртда яшаётган ҳар бир фуқарони  ўз навбатида тилимизнинг поклиги ва ўзига хослигини сақлаш, уни бойитиш ва такомиллаштиришга ўз ҳиссамизни қўшмоғимиз даркор эканлигига даъват этади. Зеро, ноёб хазинамиз - тилимизни асраш ҳаммамизнинг бурчимиздир.

 

Рустамхон Темиров,

Косонсой туман ҳокимлиги ахборот хизмати раҳбари

КОСОНСОЙДА САЙЛОВ ЖАРАЁНЛАРИ БЎЛИБ ЎТДИ

11.10.2020

Бугун 11 октябрь Халқ депутатлари Косонсой туман Кенгашининг бўшаб қолган “1-Баҳористон” сайлов округи депутатлигига сайлов бўлиб ўтди. Мазкур сиёсий жараён пандемия шароитида ўтказилаётганлиги сабабли, карантин қоидаларига риоя қилинди. Сайловчиларга ниқоб ва қўлқоплар берилди. “Баҳористон” ҳамда “Олмазор” маҳаллаларининг 148-ҳамда 149чи сайлов участкаларида сайловчилар учун барча шароитлар яратилди.

148-сайлов, 149-сайлов участкаларида сайловчилар ушбу жараёнда фаоллик билан иштирок этишди. Албатта сайловларда шаффофлик, очиқлик ва ошкораликни таъминлаш муҳим ўринга эга. Ўтказилган мазкур сайлов жараёнида ҳам ана шу жиҳатларга эътибор қаратилди. Бюллетенлар барабанга тушгандан сўнг, саноқ комиссияси томонидан овозлар санаб чиқилди. Ёш сайловчилар конституцион ҳуқуқларидан фойдаланган ҳолда сайловда иштирок этишди. 

Жисман имконияти чекланган, кекса авлод вакилларининг уйларига бориб, кўчма қутиларда овоз бериш жараёнлари амалга оширилди. Барча жараёнлар фуқароларнинг кўз ўнгида ўтказилганлиги сайловнинг очиқлик ва шаффофлик тамойилларига асосланганлигидан даракдир.

 

Косонсой туман ҳокимлиги ахборот хизмати

ХАЛҚ ДЕПУТАТЛАРИ КОСОНСОЙ ТУМАН КЕНГАШИНИНГ СЕССИЯСИ БЎЛИБ ЎТДИ

08.10.2020

Жорий йил 8 октябрь куни Халқ депутатлари Косонсой туман Кенгашининг навбатдаги ўн бешинчи сессияси бўлиб ўтди.

 

Сессия ишида туман Кенгаши депутатлари, секторлар раҳбарлари, туман ҳокими ўринбосарлари, тегишли корхона ва ташкилотлар ҳамда оммавий ахборот воситалари вакиллари қанашди.

Дастлаб сессия кун тартибидаги биринчи масала Косонсой туманини 2020-2021 йилларда комплекс ижтимоий-иқтисодий ривожлантириш орқали “Сариқ” ҳудуддан чиқариш тўғрисида”ги секторлар раҳбарларининг ҳисоботлари тингланди.

Жумладан, туман ҳокими Баҳодир Юсупов 2020 йил 9 ойи давомида туманни ижтимоий-иқтисодий ривожлантириш борасида амалга оширилган ишлар, эришилган ютуқлар, натижалар, шу билан биргаликда йил якунига қадар ҳамда 2021 йилда рейтинг кўрсаткичлари натижасига кўра “ўрта” кўрсаткичдан “яхши” кўрсаткичга кўтарилиш бўйича режалаштирилган, амалга ошириш лозим деб белгиланган ишлар тўғрисида батафсил ҳисобот берди.

Шундан сўнг навбатдаги масала - Ғаллачилик кластерини ташкил этиш тўғрисида Косонсой тумани ҳокимининг ҳисоботи тингланди.

Шунингдек, сессия давомида туман ҳокимининг сессиялар оралиғида қабул қилган айрим қарорлари депутатлар томонидан тасдиқланди.

Сессияда кун тартибидаги масалалар юзасидан Халқ депутатлари туман Кенгашининг тегишли қарорлари қабул қилинди.

 

Туман ҳокимлиги ахборот хизмати

КОСОНСОЙ ТУМАН ҲОКИМИНИНГ 1027-СОНЛИ ҚАРОРИ

05.10.2020

Ижтимоий муҳофазага муҳтож, иш топишда қийналаётган ва меҳнат бозорида тенг шартларда рақобатлаша олмайдиган шахсларни ишга жойлаштириш учун иш ўринларини 2021 йил учун

банд қилиб қўйиш тўғрисида

 

“Аҳолини иш билан таъминлаш тўғрисида”ги Ўзбекистон Республикаси Қонунининг 17-моддаси, “Ўзбекистон Республикасида ногиронларни ижтимоий ҳимоя қилиш тўғрисида”ги Ўзбекистон Республикаси Қонунининг 25-моддаси, Ўзбекистон Республикаси Президентининг 2019 йил 5 мартдаги “2019 йилда аҳоли бандлигини таъминлаш ва янги иш ўринларини ташкил этиш бўйича давлат буюртмаси тўғрисида”ги ПҚ-4227-сон Қарори, Ўзбекистон Республикаси Вазирлар Маҳкамасининг 2017 йил 5 декабрдаги 965-сон қарори билан тасдиқланган “Ижтимоий муҳофазага муҳтож, иш топишда қийналаётган ва меҳнат бозорида тенг шартларда рақобатлаша олмайдиган шахсларни ишга жойлаштириш учун иш ўринларининг энг кам сонини белгилаш ва захирага қўйиш тартиби тўғрисида”ги Низом, шунингдек Ўзбекистон Республикаси Бандлик ва меҳнат муносабатлари вазирининг 2019 йил 10 майдаги 19-2019-Б-сон буйруғи билан тасдиқланган “Ўзбекистон Республикаси Бандликка кўмаклашиш давлат жамғармаси маблағлари ҳисобидан субсидия ва грантлар ажратиш тартиби тўғрисида”ги Низомга (рўйхат рақами 3163, 2019 йил 31 май) асосан, ижтимоий муҳофазага муҳтож, иш топишда қийналаётган ва меҳнат бозорида тенг шартларда рақобатлаша олмайдиган шахсларни ишга жойлаштириш мақсадида туманда 2021 йил учун иш ўринларини банд қилиб қўйиш мақсадида,

 

Қ А Р О Р   Қ И Л А М А Н :

1. Тумандаги ижтимоий муҳофазага муҳтож ва иш топишда қийналаётган шахсларни ишга жойлаштириш учун иш жойларининг энг кам миқдорини белгилаш бўйича комиссия таркиби 1-иловага,
2021 йилда мазкур тоифадаги шахслар учун иш жойларининг энг кам миқдори белгиланган корхоналар ва ташкилотлар рўйхати 2-иловага асосан тасдиқлансин.

2. “Аҳолини иш билан таъминлаш тўғрисида”ги Ўзбекистон Республикаси Қонунининг 17-моддасига асосан туманда ижтимоий муҳофазага муҳтож, иш топишда қийналаётган ва меҳнат бозорида тенг шартларда рақобатлаша   олмайдиган шахслар учун 2-иловага мувофиқ ходимларнинг рўйхат бўйича ўртача сонидан 218 нафарини ташкил этадиган 10,0 фоиз миқдорида, шу жумладан:

‎‎ногиронлар учун 3,2 фоиз (69 киши, юқорида кўрсатилган иш ўринларига туманда ногирон шахсларнинг ишга жойлашиши бўйича талаб 21 та бўлганлиги сабабли, келгусида 48 та иш ўринни умумий ўрта ва ўрта махсус, касб-ҳунар таълими муассасаларини тамомлаган ёшлар, шунингдек, олий таълим муассасаларининг давлат грантлари бўйича таълим олган битирувчилари учун банд этиб қўйилсин);

умумий ўрта ва ўрта махсус, касб-ҳунар таълими муассасаларини тамомлаган ёшлар, шунингдек, олий таълим муассасаларининг давлат грантлари бўйича таълим олган битирувчилари учун 3,7 фоиз (81 киши); ‎‎  ўн тўрт ёшгача ва ногирон болалари бўлган ёлғиз ва кўп болали ота-оналар учун 1,6 фоиз (34 киши); ‎

пенсияолди ёшидаги шахслар учун 0,6 фоиз (14 киши);‎‎‎

сафарбарлик чақируви захирасида хизматни ўтаган ва Ўзбекистон Республикаси Қуролли Кучлари сафларидан муддатли ҳарбий хизматдан бўшатилган шахслар учун 0,3 фоиз (7 киши);

жазони ижро этиш муассасаларидан озод қилинган ёки суднинг қарорига кўра тиббий тусдаги мажбурлов чоралари қўлланилишидан озод қилинган шахслар учун 0,3 фоиз (7 киши);‎

‎‎‎‎ижтимоий муҳофазага муҳтож шахсларнинг бошқа тоифалари, шу жумладан одам савдоси қурбонлари учун 0,3 фоиз
(6 киши) миқдорида иш ўринлари заҳирасини белгилансин.

3. Ушбу тоифа шахслар учун иш ўринлари ходимлар томонидан ўзларининг меҳнат мажбуриятларини тўсиқларсиз бажаришини таъминлайдиган санитария-гигиена нормалари ва меҳнат шароитларига мувофиқ бўлишини таъминлаш, шу жумладан қуйидагиларга мувофиқ бўлиши керак:

ёлғиз ота, ёлғиз она ва 14 ёшгача бўлган ногирон болалари бор кўп болали ота-оналар учун – болаларни тарбиялаш ва меҳнат мажбуриятлари бўйича вазифаларни уйғунлаштириш имконини берадиган, ўзгарувчан иш жадвалига эга бўлган иш ўринлари;

таълим муассасаларини тугатган ёшлар учун – уларнинг касб бўйича тайёргарлигига мувофиқ бўлган иш ўринлари;

муддатли ҳарбий хизматдан бўшатилган шахслар учун – уларнинг касб бўйича тайёргарлигига мувофиқ бўлган иш ўринлари;

ногиронлар учун – меҳнат шароитлари бўйича аттестациядан ўтказилган ҳамда ходимга иш жараёнларини тўсқинликсиз бажариш имконини (соғлиғининг аҳволи ва меҳнат фаолиятига нисбатан белгиланган зид кўрсаткичлар ҳисобга олинган ҳолда) берадиган иш ўринлари;

туман Аҳоли бандлигига кўмаклашиш марказида иш қидирувчи сифатида ҳисобда турган пенсия ёшига яқинлашиб қолган шахслар учун – махсус малакани талаб қилмайдиган иш ўринлари;

жазони ўташ муассасаларидан бўшатилган, жазони ўтаётган ёки суд қарорига кўра тиббий характердаги мажбурий чоралар кўрилган шахслар, одам савдосидан жабрланганлар учун – уларнинг касб бўйича тайёргарлиги ҳисобга олинган ҳолдаги иш ўринлари, муайян
касб-ҳунарга, малакага эга бўлмаган шахслар учун эса – махсус малакани талаб қилмайдиган иш ўринлари.

4. Иш ўринлари банд қилиб қўйиладиган касблар ва лавозимлар рўйхати қуйидагича белгилансин:

муҳандислар, иқтисодчилар, ҳисобчи, ҳисобчи-тафтишчи, ҳуқуқшунос, зоотехник, агроном, шифокор, ҳамшира, кичик тиббий ходим, иш юритувчи, ўқитувчи, тарозибон, электр ва автоаравача ҳайдовчиси, ташувчи, фаррош, ўтёқар, ободонлаштириш ишчиси, омборчи, ЭҲМ оператори, тикувчи, юкчи, ишчи, боғбон, қоровул.

5. Тумандаги мавжуд корхона, ташкилот ва муассасаларнинг раҳбарларига:

Ўзбекистон Республикаси Вазирлар Маҳкамасининг 2017 йил
5 декабрдаги 965-сонли қарори билан тасдиқланган “Ижтимоий муҳофазага муҳтож, иш топишда қийналаётган ва меҳнат бозорида тенг шартларда рақобатлаша олмайдиган шахсларни ишга жойлаштириш учун иш ўринларининг энг кам сонини белгилаш ва захирага қўйиш тартиби тўғрисида”ги Низомга мувофиқ ижтимоий муҳофазага муҳтож ва иш топишда қийналаётган шахслар учун кўрсатилган иш ўринлари ташкил этилишини таъминлаш;

йил бошлангунга қадар ўн кундан кечикмай ижтимоий муҳофазага муҳтож ва иш қидиришда қийналаётган шахсларни ишга жойлаштириш учун банд қилиб қўйилган иш ўринлари умумий сонининг камида
25 (йигирма беш) фоизи ҳажмида иш ўринлари банд қилиб қўйилишини ва тайёр бўлишини таъминласин, ушбу тўғрисида туман Аҳоли бандлигига кўмаклашиш марказига йил бошлангунга қадар ахборот берилсин;

ижтимоий муҳофазага муҳтож ва иш қидиришда қийналаётган шахслар учун иш ўринларининг қолган қисмини банд қилиб қўйиш ташкилот (иш берувчи) томонидан календарь йилнинг биринчи чораги мобайнида таъминлаш, бу тўғрида туман Аҳоли бандлигига кўмаклашиш марказига биринчи чорак тугагандан кейин ўн кундан кечикмай ахборот бериш;

ташкилотлар ҳар чоракда туман Аҳоли бандлигига кўмаклашиш марказига юқорида кўрсатилган тоифадаги шахсларнинг ишга жойлаштирилиши тўғрисида ушбу низомга 5-иловага мувофиқ шакл бўйича ахборот тақдим этиши;

банд қилиб қўйилган иш ўринларининг белгиланган сони ҳисобига ижтимоий муҳофазага муҳтож ва иш қидиришда қийналаётган шахсларни ишга жойлаштириш учун иш ўринларининг тайёрлиги тўғрисидаги ахборотни ташкилот томонидан такдим этилмаганлигига ҳам ва амалда уларнинг тайёр эмаслигига ҳам меҳнат органи томонидан маҳаллий давлат ҳокимияти органи қарорининг бажарилмаганлиги сифатида қараши лозимлиги қайд этилсин.

6. Ушбу қарор бажарилмаган тақдирда шунингдек, уларни ишга қабул қилиш асоссиз равишда рад этилганлиги учун ташкилотларнинг мансабдор шахсларига “Ижтимоий муҳофазага муҳтож ва иш топишда қийналаётган шахсларни ишга жойлаштириш учун иш ўринларини банд қилиб қўйиш тартиби тўғрисида”ги Низомнинг 21-бандига мувофиқ маъмурий жавобгарлик белгиланиши кўрсатиб ўтилсин.

7. Ўзбекистон Республикаси Бандлик ва меҳнат муносабатлари Вазирининг “Ўзбекистон Республикаси Бандликка кўмаклашиш давлат жамғармаси маблағлари ҳисобидан субсидия ва грантлар ажратиш тартиби тўғрисидаги Низомни тасдиқлаш ҳақида”ги 31.05.2019 йил кундаги АВ №3163-сонли буйруғига асосан “ижтимоий эҳтиёжманд аҳоли қатламларига мансуб шахсларни, квоталанган иш ўринларининг энг кам сонидан ортиқ миқдорда ишга қабул қилган корхона, ташкилотларга - ҳар бир ходим учун 12 ой давомида, ҳар ойда базавий ҳисоблаш миқдорининг 2 баравари миқдорида ҳақ тўлаш тўғрисида” норма белгиланганлиги маълум қилинсин.

8. Туман Аҳоли бандлигига кўмаклашиш маркази (З.Ахмедов) беш кун муддатда ушбу қарорни 1-бандида кўрсатилган ташкилот раҳбарлари эътиборига етказсин ва ушбу қарорнинг бажарилиши устидан назоратни таъминласин.

9. Ушбу қарор “Косонсойнома” туман газетасида расман эълон қилинсин ва туман ҳокимлигининг расмий веб-сайтига жойлаштирилсин.

10. Ушбу қарор расман эълон қилинган кундан бошлаб 3 ойдан кейин кучга киради.

11. Мазкур қарор ижросини назорат қилиш туман ҳокимининг биринчи ўринбосари М.Қаюмов зиммасига юклансин.

 

 

  Туманҳокими                                    Б. Юсупов

КОСОНСОЙ ТУМАН ҲОКИМИГА ЯНГИ ЎРИНБОСАР ТАЙИНЛАНДИ

05.10.2020

Косонсой туман ҳокимининг 2020 йил 2 октябрь кунги қарори билан Жабборов Шавкатжон Абдусатторович – Косонсой тумани ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари-иқтисодий тараққиёт ва камбағалликни қисқартириш бўлими бошлиғи этиб тайинланди.

Жабборов Шавкатжон 1984 йилда Косонсой туманида туғилган. 

 

2009-2018 йилларда Косонсой тумани молия бўлимида ҳисобчи, бош иқтисодчи, бўлим бошлиғи вазифасини бажарувчи, молия бўлими мудири ўринбосари, молия бўлими мудири вазифасини бажарувчи, бюджет бўлими бошлиғи, молия бўлими мудири биринчи ўринбосари;

 

2018 -2019 йилларда Косонсой тумани ҳокимнининг инвестициялар, иновациялар, хусусийлаштирилган корхоналарга кўмаклашиш ва кичик саноат зоналари ҳамда туризмни ривожлантириш масалалари бўйича ўринбосари;

 

2019 йилдан ҳозирги вақтгача Косонсой тумани хокимнининг ўринбосари - туман инвестициялар ва ташқи савдо бўлими бошлиғи лавозимида фаолият кўрсатиб келган.

 

2013 йилларда Тошкент банк молия академияси магистранти

2019-2020 йилларда Ўзбекистон Республикаси Президенти ҳузуридаги Давлат бошқаруви Академияси магистранти.

 

Косонсой туман ҳокимлиги ахборот хизмати

 
© 2014-2020, Namangan viloyat Kosonsoy tuman hokimligining rasmiy axborot portali. Sayt materiallaridan foydalanilganda www.kosonsoy.uz manbasi ko'rsatilishi shart.
Sayt Namangan viloyati hokimligining Kompyuterlashtirish markazi tomonidan ishlab chiqilgan.