«2021 йилда 54 минг оилани уй-жой билан таъминлашимиз зарур» – президент

03.03.2021

Ўзбекистонда аҳолининг эҳтиёжини қондириш учун йилига камида 100-150 мингта уй-жой қуриш талаб этилади. Бу ҳақда президент Шавкат Мирзиёев уй-жой қурилиши ва ипотека бозорини ривожлантириш борасидаги вазифалар бўйича видеоселектор йиғилишида айтиб ўтди.

 

«Ўтган 4 йилда давлат дастурлари асосида 140 минг ёки йилига ўртача 35 мингдан уй-жойлар барпо этилган бўлиб, бу олдинлари йилига қурилган ўртача уй-жойдан 4-5 баравар кўп, дегани. Лекин, бу етарли эмас.

Ҳисоб-китобларга кўра, мамлакатимиз аҳолисининг уй-жойга бўлган эҳтиёжини тўлиқ қондириш учун йилига камида 100-150 мингта уй-жой қуриш керак», дея давлат раҳбарининг сўзларини келтирмоқда Kun.uz мухбири.

Аҳолини уй-жой билан таъминлашга оид янги фармон лойиҳаси тайёрланган.

Ушбу фармонда, энг муҳими аҳолининг барча қатламларини уй-жой билан таъминлаш ва бу борада уларнинг танлаш имкониятларини кенгайтириш кўзда тутилмоқда.

Биринчидан, жорий йилда 54 минг оилаларни уй-жой билан таъминлаш зарур.

Жумладан, давлат ипотека дастури доирасида жами 45 мингта ёки ўтган йилга нисбатан 2 баравар кўп уй-жойлар қурилади.

Шундан:

  • «Қишлоқ қурилиш инвест» ва «Шаҳар қурилиш инвест» томонидан 12 мингта;
  • янги тартиб бўйича Молия вазирлиги тижорат банкларига жойлаштирадиган ресурслар ҳисобига 26,5 мингта квартира;
  • ҳар бир вилоятда якка тартибдаги уй-жой қуриш учун 500тадан, жами 6,5 мингта оилага кредит ажратилади.

Шунингдек, хусусий тадбиркорлар томонидан қурилиши бошланган 8 мингта квартира жорий йилда фойдаланишга топширилади.

Бундан ташқари, оғир турмуш шароитига тушиб, бошпанасиз қолган 1 мингта оила, айниқса аёлларга «ижтимоий уй-жойлар» ижара асосида ажратилади.

Жами 54 минг уй-жойдан: Қорақалпоғистонда – 2 290та, Андижонда – 4 665та, Бухорода – 3 220та, Жиззахда – 1 670та, Қашқадарёда – 3 710та, Навоийда – 1 836та, Наманганда – 4 025та, Самарқандда – 4 479та, Сурхондарёда – 3 989та, Сирдарёда – 1 414та, Тошкент вилоятида – 4 046та, Фарғонада – 4 530та, Хоразмда – 3 016та ва Тошкент шаҳрида – 7 556та уй-жой топширилади.

Ҳоким қабули ўтказилди

03.03.2021

 

Косонсой туман ҳокими Баҳодир Юсупов сектор раҳбарлари билан биргаликда бугун одатдагидек фуқаролар қабулини ўтказди.
Қабул давомида жами 106 та мурожаат тингланди. Уларнинг 41 таси уй-жой, 22 таси тадбиркорлик учун ер олиш, 8 таси уй таъмирлаш, 24 таси боғдорчиликни ривожлантириш, 7 таси кредит олиш, 12 таси моддий ёрдам ва бошқа масалалар хусусида бўлди.
Туман раҳбари мурожаатчиларнинг ҳар бири билан очиқ суҳбатлашди. Масалаларнинг 57 таси жойида ҳал этилди, 49 таси бўйича тушунтириш берилди, 00 таси мутасаддиларга ўрганиб чиқиш учун тавсия этилди.

Туркиялик мутахассис билан учрашув ўтказилди

03.03.2021

 

Президентимизнинг 2021 йил 11 январдаги “Наманган вилоятининг Косонсой, Чортоқ ва Янгиқўрғон туманларида мева-сабзавотчилик ва узумчиликни ривожлантириш чора-тадбирлари тўғрисида”ги ПҚ-4941-сонли қарори ижросини туманда изчил таъминлаш орқали экспорт салоҳиятини ортишига эришиш йўналишида Косонсой туманида олиб борилаётган ишларни жадаллаштириш ва унумдорлигини ошириш мақсадида бугун 3 март куни туман ҳокимлиги биносида Косонсой туман ҳокимининг ўринбосари - инвестициялар ва ташқи савдо бўлими бошлиғи Б.Салимжонов томонидан боғдорчилик йўналиши бўйича туркиялик мутахассис “Astek Agribusiness solution group” бош менежери  Аҳмет Мелих Текин “Natural Fruits Trade Export” МЧЖ раҳбари Қ.Искандаровлар билан учрашув ўтказилди. Мазкур учрашувда туркиялик мутахассис томонидан ўз мутахассислиги йўналишида тумандаги янги ташкил этилиши белгиланган ва ташкил этилган боғдорчилик йўналишидаги тадбиркорларга ўз ёрдамини аямаслигини маълум қилиб, намуна сифатида ҳозирги кунда "Natural Fruits Trade Export" МЧЖ томонидан ташкил этилиши режалаштирилаётган боғдорчилик хўжалиги негизида ўз тажрибасини баҳам кўришини билдириб ўтди. Ушбу йўналишларда Аҳмет Мелих Текин билан ҳамкорликда иш олиб борилиши бўйича келишиб олинди.

Фарғона вилоятига янги прокурор тайинланди

02.03.2021

Ўзбекистон бош прокурорининг буйруғига асосан, Наманган вилояти прокурорининг биринчи ўринбосари лавозимида ишлаб келган Бахтиёр Исмоилов Фарғона вилояти прокурори этиб тайинланди.

 

Вилоят ҳокимлиги хабарига кўра, ушбу тайинлов Фарғона вилояти ҳокимлигида бош прокурор Ниғматилла Йўлдошев, вилоят ҳокими Хайрулла Бозоров, вилоят секторлари ҳамда бошқарма-ташкилотлар раҳбарлари, жамоатчилик вакиллари иштирокидаги йиғилишда эълон қилинган.

Бахтиёр Исмоилов 2003-2015 йиллар давомида Андижон вилояти прокуратураси органларида турли лавозимларда меҳнат қилган, 2015-2016 йилларда Бош прокуратура Суд қарорларини ижро этишда ва қамоққа олинганларни сақлашда қонунларга риоя этилиши устидан назорат бошқармаси катта прокурори бўлган.

У 2017-2021 йилларда Фарғона вилояти прокурори ўринбосари, Фарғона вилояти прокурорининг биринчи ўринбосари лавозимларида фаолият юритган.

Аввалроқ, Фарғона вилояти прокурори лавозимида ишлаб келган Улуғбек Қосимов Тошкент шаҳрининг янги прокурори этиб тайинланганди.

Наманганда президент билан суратга тушган қизалоқ ўз оиласига қайтди

02.03.2021

Намангандаги 26-Меҳрибонлик уйида президент кўтариб суратга тушган қизалоқ ва унинг ука-сингиллари ана шу учрашувдан сўнг ўз онаси бағрига қайтди.

Kun.uz мухбири ушбу оила ҳолидан хабар олиш учун улар истиқомат қилаётган уйга борди.

Нилуфар Умрзоқова — 4 фарзанднинг ёлғиз онаси. У ёлғиз боши билан фарзандларини боқишга қийналиб қолгач, моддий аҳволини яхшилаб олиш учун болаларини вақтинча меҳрибонлик уйига топширишга мажбур бўлган.

«Болаларимни дуо қилардим, мана ижобат бўлди»

Нилуфар Умрзоқова тайинли иш топа олмагач, болаларининг таъминотидан қийналиб қолиб, 2018 йилнинг кузида уларни меҳрибонлик уйига топширган.

«Катта қизим Ҳадича 2010 йилда туғилган. Ҳалимахон қизим 2011 йилда туғилган, эгизакларим Фотимахон ва Ҳусанбой 2016 йилда туғилган. Шу тўрт болага ёлғиз онаман.

Болаларимнинг иссиқ-совуғидан кўнглим тўлгач, ишлаб пул тўплаш ва уй-жой қилиш ниятида эдим. Шу боис нима меҳнат бўлса қилдим, ҳар ишга ўзимни уриб кўрдим, бировларнинг қўлида ишладим. Ота-онам ўтиб кетишган. Яхши бир укам бор, унинг ёрдами билан шу уйни кўтардик. Лекин яшаш учун шароит яхши эмасди», дейди болаларнинг онаси.

У болаларини қайтариб олиш учун ҳужжат ишларини тўғрилаб юрганида, қизалоғини давлат раҳбари кўтариб суратга тушгани унинг бу ҳаракатини янада тезлатиб юборган.

«Жуда қувондим, болаларимни «Аллоҳ назар солсин, президентнинг ёнида юринглар», деб дуо қилардим. Мана, ижобат бўлди», дейди она.

Нилуфар Умрзоқова бошида «болаларимни уддалай олармикинман?», дея чўчигани ҳам рост. Чунки уларни бекам-у кўст қилиб вояга етказишни истайди.

«Худога шукр, яхши одамлар орамизда кўп. Уларнинг кўмаги билан мана фарзандларим бағримга қайтди, беҳисоб шукр. «Саховат Наманган» хайрия жамоат фонди вакиллари катта ёрдам кўрсатишди. Уй-жойимизни таъмирлаб, шароитларни яхшилаб беришди. Бундан буёғига ҳам шу болаларим вояга етгунча таъминотига ёрдамлашиб турадиган бўлишди», — дейди у.

Ҳар бир бола ўз ота-онасининг бағрида яйрасин

«Нилуфар болаларни олиб келганида Фотима ва Ҳусантой чақалоқ эди, бизда низом бўйича 3 ёшдан 16 ёшгача бўлган болалар қабул қилинади. Шу боис, Ҳадича ва Ҳалимани олиб қолдик, эгизакларни эса бир йил ўтгач тарбиямизга олдик», дейди Намангандаги 26-сонли Меҳрибонлик уйи директори Дилором Абдураҳимова.

Педагогнинг айтишича, бошида Ҳадича ва Ҳалиманинг ўқиши яхши бўлмаган, уларга алоҳида педагог ёлланган.

«Меҳрибонлик уйимизга келган дастлабки кунларида бу болалар билан бирга қолишга ҳам тўғри келган, чунки уларнинг руҳий ҳолати ҳам яхши эмасди. Психолог ёрдамида уларни бу ҳолатдан олиб чиқдик. Ўқишлари ҳам яхши тарафга ўзгарди. Спортга ва турли тўгаракларга қизиқиб, қатнаша бошлашди», дейди директор.

Президентнинг меҳрибонлик уйига ташрифи кутилмаганда бўлган. Болалар бундан жуда қувонишган.

«Мана шу ташриф – давлат раҳбарининг болаларга оталарча меҳр кўрсатганлари кўп оналарга қандайдир туртки бўлди, хусусан, Нилуфарга ҳам. Она болаларини олиб кетиш пайида юрган эди. Мана, уч кун бўлди, болажонлар онаси бағрига қайтди. Кўзимизда ёш билан кузатдик», дейди Д.Абдураҳимова.

Ушбу даргоҳда 8 йилдан бери ишлаётган Дилором Абдураҳимова ҳар бир бола ўз ота-онасининг бағрида яйрашини истайди.

«Оила бой бўладими, камбағал бўладими, ота-онанинг ўрнини ҳеч ким, ҳеч нарса боса олмас экан. Бир нарса мени қувонтиряпти, меҳрибонлик уйидаги болажонларимиздан кўпи оиласига эга бўляпти. Охирги 3 ой ичида 13 нафар болани муносиб оилалар қарамоғига бердик, уларнинг ичида ўз оиласига қайтариб олинган болалар ҳам бор», дейди директор.

Орамизда саховатли инсонлар кўплиги сабаб бир оила бирлашмоқда. «Саховат Наманган» хайрия жамоат фонди вакиллари бу оилани ўз оталиғига олди. Уларнинг таъкидлашича, болалар вояга етгунга қадар моддий кўмак бериб борилади.

Юлдузхон Юлдашева, Kun.uz мухбири

Косонсой туманида янги замонавий дорихона фаолиятини бошлади

01.03.2021

 

 

Туманимизда очилган янги, замонавий “Compos farm” дорихонаси аҳолини юқори сифатли, зарур дори-дармонлар билан таъминлашни мақсад қилган.  Эътиборлиси ушбу дорихона аҳолига анча арзон нархларда дори-дармон воситаларини таклиф қилади.

 

 Бугун ана шу дорихонанинг очилиш маросими бўлиб ўтди.

Тадбирда туман ҳокимининг ўринбосари А.Шералиев, туман тиббиёт бирлашмаси бошлиғи ўринбосари Р.Раҳматуллаев иштирок этиб, бу каби замонавий дорихоналар кўпайиши аввало туманимиз аҳолиси учун муҳим ўрин тутишини таъкидлашди. Дорихонани барпо этган тадбиркор ва ўз фаолиятини бошлаётган жамоа ишига муваффақият тилаб, бу ерда яратилган шароитлар билан танишишди.

1 мартдан алимент ундириш тартиби ўзгармоқда

28.02.2021

 

«Суд ҳужжатлари ва бошқа органлар ҳужжатларини ижро этиш тизимини янада такомиллаштириш чора-тадбирлари тўғрисида»ги президент фармонига асосан 2021 йил 1 мартдан бошлаб ижро ҳужжатлари бўйича алимент мажбуриятларини бажариш қарздорлар томонидан Алимент мажбуриятларини ижро этиш ва назорат қилишнинг ягона ахборот тизими орқали амалга оширилади.

Алимент мажбуриятларини ижро этиш ва назорат қилишнинг ягона ахборот тизими алимент мажбуриятлари бўйича алоҳида банк ҳисоб варағи билан бирлаштирилади. Бунда МИБ томонидан ижро ҳужжатлари бўйича ундирувчи (алимент олувчи) номига тегишли банк пластик картаси очилади ҳамда алимент пуллари, шу жумладан қарздорнинг иш ҳақидан ушлаб қолинган алимент пуллари ушбу алимент мажбуриятлари бўйича алоҳида банк ҳисоб варағи орқали мазкур банк картасига ўтказилади.

МИБ Жамоатчилик билан алоқалар ва ҳуқуқий ахборот бўлими бошлиғи Фаррух Тошпўлатовнинг Kun.uz'га маълум қилишича, эндиликда алимент мажбуриятлари қай даражада бажарилаётганини давлат ижрочиси томонидан мобил илова орқали мониторинг қилиб бориш имконияти яратилади.

Натижада:

  • алимент ундириш тўғрисидаги ижро ҳужжатларининг ижроси ва алимент ундирилишини назорат қилиш ишлари қисман автоматлаштирилади;
  • алимент тўловчи ва олувчиларга қулайлик яратилади;
  • алимент тўловчилар масофавий назоратда бўлади;
  • фуқаролар мурожаатлари камаяди.

Маълумот учун, Мажбурий ижро бюросида ҳозирда иш юритувидаги 1 миллион 90 мингга яқин ижро ҳужжатларининг 268 мингдан ортиғини (24,6 фоизи) алимент тўловларига оид ижро ишлари ташкил қилади.

Январь ойида Наманган вилоятида 794,5 млрд. сўмлик саноат маҳсулотлари ишлаб чиқарилди

28.02.2021

 

Вилоят статистика бошқармаси берган маълумотига кўра, 2021 йилнинг январь ойида, вилоят корхоналари томонидан 794,5 млрд. сўмлик саноат маҳсулотлари ишлаб чиқарилган бўлиб, 2020 йилнинг январь ойига нисбатан саноат ишлаб чиқаришнинг физик ҳажм индекси 104,9 % ни ташкил этди.

 

Ҳудудлар кесимида саноат ишлаб чиқариш ҳажми:

Наманган шаҳри – 276,8 млрд. сўм

Мингбулоқ тумани – 15,7 млрд. сўм

Косонсой тумани – 20,1 млрд. сўм

Наманган тумани – 72,9 млрд. сўм

Норин тумани – 23,3 млрд. сўм

Поп тумани – 57,8 млрд. сўм

Тўрақўрғон тумани – 153,1 млрд. сўм

Уйчи тумани – 43,0 млрд. сўм

Учқўрғон тумани – 50,0 млрд. сўм

Чортоқ тумани – 12,6 млрд. сўм

Чуст тумани – 56,9 млрд. сўм

Янгиқўрғон тумани – 12,3 млрд.  сўмни ташкил этди.

Профессионал таълим муассасалари ходимлари узлуксиз малака оширади

27.02.2021

 

Ҳукумат қарори (106-сон, 26.02.2021 й.) билан Профессионал таълим муассасаларининг бошқарув ҳамда педагог кадрларини қайта тайёрлаш ва малакасини ошириш жараёнини ташкил этиш тартиби тўғрисидаги низом тасдиқланди.

???? Унга кўра, барча профессионал таълим муассасаларининг бошқарув ва педагог кадрлари “Ҳаёт давомида таълим олиш” тамойили асосида узлуксиз малакасини оширади.

✅ Қайта тайёрлаш ва малака ошириш ўқув режасига мувофиқ, Олий ва ўрта махсус таълим вазирлиги ҳузуридаги малака ошириш институти ҳамда унинг ҳудудий факультетларидаги амалиёт тегишли ташкилотларда ўтказилиши мумкин.

???? Малака ошириш қуйидаги шаклларни ўз ичига олади:

● мустақил малака ошириш;
● муқобил малака ошириш;
● Институт ёки факультетларда бевосита ўқиш.

Божхона постларида нормадан ортиқ товарларни вақтинча сақлаш тартиби белгиланди

27.02.2021

 

Ҳукумат қарори билан Жисмоний шахсларнинг чегара божхона постлари орқали нотижорат мақсадларда олиб кирилаётган белгиланган меъёрлардан ортиқ бўлган товарларига нисбатан амалга ошириладиган тартиб-таомиллар тўғрисидаги низом тасдиқланди.

 

Низомга кўра, давлат божхона хизмати органлари томонидан вақтинча сақлаш учун қабул қилинган барча товарларнинг вазни ва миқдори ўлчовдан ўтказилиши шарт.

 

Вақтинча сақлаш учун қабул қилинган товарлар ва уларнинг ҳужжатлари кўпи билан 30 календарь кун, тез бузиладиган товарлар эса кўпи билан 2 календарь кун мобайнида сақланади.

 

Сақлаш муддати уларни вақтинча сақлаш учун қабул қилинган куннинг кейинги кунидан ҳисобланади.

 

Фуқаролар томонидан маълум қилинган товарларнинг божхона қийматини тасдиқловчи товар ҳужжатлари тақдим этилмаган тақдирда, давлат божхона хизмати органи товарларнинг божхона қийматини мустақил равишда белгилайди.

 

Чегара божхона постлари томонидан вақтинча сақлаш учун қабул қилинган товарларни сақлаганлик учун товарлар вақтинча сақловга олинган кундан эътиборан ҳар 100 кг.гача оғирликка (брутто) тўлиқ ва тўлиқ бўлмаган ҳар бир календарь кун учун:

 

дастлабки 5 кунда БҲМнинг 5 фоизи (12 минг 250 сўм) миқдорида, кейинги 10 кунда БҲМнинг 7 фоизи (17 минг 150 сўм) миқдорида, қолган кунларда БҲМнинг 10 фоизи (24 минг 500 сўм) миқдорида;

 

тез бузиладиган товарларни вақтинча сақлаганлик учун БҲМнинг 15 фоизи (36 минг 750 сўм) миқдорида божхона йиғими ундирилади.

 

Товарларни қайтариш, ваколатли шахс (товарларнинг эгаси) томонидан далолатноманинг божхона органи томонидан тасдиқланган нусхаси ва шахсни тасдиқловчи ҳужжатнинг аслини тақдим этиш билан амалга оширилади.

 

Товарлар божхона йиғими тўлангандан ҳамда ҳужжатлар расмийлаштируви тугагандан кейин дарҳол қайтарилади.

 
© 2014-2021, Namangan viloyat Kosonsoy tuman hokimligining rasmiy axborot portali. Sayt materiallaridan foydalanilganda www.kosonsoy.uz manbasi ko'rsatilishi shart.
Sayt Namangan viloyati hokimligining Kompyuterlashtirish markazi tomonidan ishlab chiqilgan.