Мажбурий ижро бюроси Косонсой туман бўлими томонидан вояга етмаган фарзандлари моддий таъминотидан бўйин товлаб юрганларга нисбатан судлар билан ҳамкорликда маъмурий ишлар кўриб чиқилмоқда. Хусусан, бугун 21 апрель куни ўтказилган навбатдаги суднинг ҳукми билан 2 нафар масъулиятини унутган оталарга нисбатан маъмурий қамоқ белгиланди. Аниқланишича, фуқаролик ишлар бўйича Янгиқўрғон туманларо судининг 2020 йил, 24 ноябрдаги қарорига кўра қарздор К. Э. дан ундирувчи Я. Ў. фойдасига икки нафар фарзанди учун алимент ундириш белгиланган. Мазкур ҳужжат Бюронинг Косонсой туман бўлими иш юритувига олинган ва қарздорга ўз вақтида моддий таъминотни бериб келиш тушунтирилган. Бироқ, қарздор ота алимент тўлашни пайсалга солиб келади. Кун, ой ўтиб қарздорлик салкам 12 млн.сўмга етди. Бу бўйича тўпланган ҳужжатлар жиноят ишлари бўйича Косонсой туман судига юборилди. Бўлиб ўтган суд мажлисида унга нисбатан 15 сутка маъмурий қамоқ белгиланди. Яна бир фуқаро С. О ҳам алимент тўламагани учун 15 сутка маъмурий қамоқ жазосига ҳукм қилинди.
МИБ Наманган вилоят бошқармаси