50 ming nafar aholi toza ichimlik suvi bilan ta’minlanadi

02.12.2016

50 ming nafar aholi toza ichimlik suvi bilan ta’minlanadi

 «Suv keltirgan elda aziz», deydi dono xalqimiz. Ozod va hur diyorimizda aholini toza ichimlik suvi bilan ta’minlashga alohida e’tibor berib kelinmoqda. Xususan, hukumatimizning «Namangan viloyati Kosonsoy tumanida ichimlik suvi ta’minotini yaxshilash maqsadida «Obod» suv to’plash va tozalash inshooti qurilishi to’g’risida»gi 464-F-sonli farmoyishi ham ana shu maqsadga xizmat qilmoqda.

Loyiha qiymati 19849,470 mln. so’m bo’lgan inshootda o’tgan davrda «Yuggazspetsmontaj» unitar korxonasi bosh pudratchiligida katta hajmda qurilish – montaj ishlari amalga oshirildi. Jumladan, loyihaning «Guliston» inshootida soydan suv olish kanali, rezervuar va 4 ta zamonaviy «Gruntfos» nasos agregati o’rnatildi. Asosiy «Obod» inshootida 4 ta suv tindirish va toza suv saqlash hovuzi, filьtrlash, nasos stantsiyalari, xlorlash, laboratoriya, binolari, podstantsiyalar bunyod etildi.

Kecha inshootning foydalanishga topshirish marosimi bo’lib o’tdi. Unda korxona, tashkilot, muassasalar rahbarlari, mahallalar faollari qatnashdilar. Marosimni tuman hokimining birinchi o’rinbosari SH. Dadaboev ochdi. Unda so’z olgan viloyat «Suvoqava» Davlat unitar korxonasi direktori M. Oppoqov yig’ilganlarni yangi inshoot bilan qutladi va o’z so’zida «Obod» suv to’plash va tozalash inshootining ishga tushirilishi natijasida tumanda 50 ming nafardan ziyod aholini toza ichimlik suvi bilan ta’minlashga keng imkoniyat yaratilganligini ta’kidlash bilan birga, ayni damda umumiy uzunligi 13,09 kilometr bo’lgan ichimlik suv tarmog’ini tortish ishlari jadal olib borilayotgani, bu ish nihoyasiga yetkazilganidan keyin yana qo’shimcha ravishda 32 ming nafardan ortiq aholini toza ichimlik suvi bilan ta’minlanishi ko’zda tutilganligini e’tirof etdi.

Yangi inshootning ochilish marosimi bayramona tusga aylandi. Doshqozonda osh damlandi. Barcha dasturxon atrofida jamuljam bo’ldi. Qur’on tilovat qilindi, nuroniy oqsoqollar duoga qo’l ochib, yangi inshoot bunyodkorlariga rahmatlar aytishdi. Tinchlik va barqarorligimiz abadiy bo’lishini Yaratgandan so’rashdi.

 
© 2014, Namangan viloyat Kosonsoy tuman hokimligining rasmiy axborot portali. Sayt materiallaridan foydalanilganda www.kosonsoy.uz manbasi ko'rsatilishi shart.
Sayt Namangan viloyati hokimligining Kompyuterlashtirish markazi tomonidan ishlab chiqilgan.